Almaniya Rusiyanı "böyük ziyanla" hədələdi
“Rusiya çox böyük iqtisadi və siyasi zərbə alacaq”
Almaniya kansleri Angela Merkel Krımda vəziyyət gərginləşməkdə
davam edərsə, Avropanın Rusiyaya "çox böyük iqtisadi və siyasi
ziyan vuracağı" barədə xəbərdar edib. "Amerikanın səsi"nin verdiyi
xəbərə görə, Bundestaqda çıxışı zamanı Merkel Moskvanın ünvanına
indiyədək ən böyük hədəni dilə gətirib. Kansler deyib: "Rusiya öz
kursunu davam eləsə, bu, təkcə Ukrayna üçün fəlakət olmayacaq, eyni
zamanda Avropa Birliyi ilə Moskva arasında münasibətlərə təsir
edəcək. Ən əsası, Rusiya çox böyük iqtisadi və siyasi zərbə
alacaq". O, Krımın Kosovo ilə müqayisəsi ilə bağlı Moskvanın
iddialarını rədd edib. "Bir şey tam aydın olmalıdır. Ukraynanın
ərazi bütövlüyü müzakirə mövzusu ola bilməz" – deyə, Merkel
bildirib.