Təhsil Nazirliyi bu ilin iyununda Azərbaycanda
iş yerlərini dəyişmək istəyən müəllimlər üçün yeni formada
keçiriləcək müsabiqənin tələblərini açıqlayıb. Movqe.az-ın Təhsil
Nazirliyinin saytına istinadən xəbərinə görə, təhsil nazirinin 24
aprel tarixli 445 nömrəli əmri ilə təsdiq edilmiş ümumi təhsil
müəssisələrində və peşə liseylərində müəllimlərə tələbatın
müəyyənləşdirilməsi, pedaqoji kadrların yerdəyişməsi və işə qəbulu
ilə əlaqədar qaydalarda hazırda təhsil müəssisələrində işləyən
müəllimlərin yerdəyişməsinin həyata keçirilməsi üzrə də yeni
mexanizmlər nəzərdə tutulub.Belə ki, daimi əsaslarla işləyən
müəllimlərin bir rayon (şəhər) daxilində yerdəyişməsi təhsil
müəssisəsinin direktorunun rəyi nəzərə alınmaqla, tabelik üzrə
təhsili idarəetmə orqanı tərəfindən həyata keçiriləcək. İş yerini
bir rayondan (şəhərdən) başqa rayona (şəhərə) dəyişmək istəyən
müəllimlər isə Təhsil Nazirliyinə müraciət etməli olacaqlar.Həmin
müəllimlərin yerdəyişməsi mərkəzləşdirilmiş qaydada iki mərhələli
müsabiqə yolu ilə (elektron ərizədəki göstəricilərin
qiymətləndirilməsi və müsahibə) proqram təminatı tətbiq olunmaqla
həyata keçiriləcəkdir. Müsabiqədə iştirak etmək istəyən müəllimlər
üçün xüsusi tələblər irəli sürülməsə də, bu proses zamanı onların
peşə kompetensiyaları, pedaqoji fəaliyyəti dövründə əldə etdiyi
nailiyyətləri və peşəkar inkişafı xüsusi qaydada
qiymətləndiriləcəkdir. Müsabiqənin sonrakı illərdə də bu formada
keçirilməsi nəzərdə tutulur. Lakin gələcəkdə dəyişən reallıqlara
müvafiq olaraq bu qaydalarda dəyişikliklərin olması ehtimalı hər
zaman mövcuddur.
Qeyd edək ki, ötən il Təhsil Nazirliyi tərəfindən 3286 vakant yer müsabiqəyə çıxarılıb. Lakin müəllimlərin həftəlik dərs yükünün yuxarı həddinin 24 saatdan 36 saata qaldırılması ilə əlaqədar bu il vakansiyanın sayının aşağı düşməsi proqnozlaşdırılır. Keçən il ən çox vakansiya biologiya fənni üzrə olub. Kimya, coğrafiya, fizika, Azərbaycan dili və ədəbiyyatı fənləri üzrə də vakant yerlərin sayı çox olub.Bölgələrdə vakant yerlərin çox olması buradakı məktəblərdə azsaatlı vakansiyaların sayının çoxluğu ilə izah oluna bilər. Belə ki, həmin dərslərin tədrisi əmək haqqına cüzi təsir etdiyi üçün müəllimlər tərəfindən bu yerlərə maraq azdır.