Bakının Yasamal rayonu, Hüseyn Cavid
prospektində yerləşən A.N.Ələkbərov adına Respublika İncəsənət
Gimnaziyasının 2-c korpusunun müəllimləri işlərini itirə bilər.
Movqe.az -ın məlumatına görə, bu barədə müəllimlər
Anspress-ə bildiriblər. Müəllimlərin sözlərinə görə, gimnaziya
binasında məskunlaşan məcburi köçkünlər artıq mənzillərlə təmin
olunub. Vaxtilə müəllimlərə məxsus olan özəlləşdirilmiş evlərin
sakinlərinə isə dövlət tərəfindən kompensasiya verilib. Müəllimlərə
isə qeyri-rəsmi olaraq köçmək göstərişi verilib. Gimnaziyada
çalışan 257 müəllim isə buna etiraz edir.
Məsələyə aydınlıq gətirmək üçün hadisə yerinə yollandıq. Əraziyə
baxış keçirərkən binanın təmir olunduğunu gördük. Onu da öyrəndik
ki, bu gün müəllimlər etiraz aksiyası keçirmək istəyiblər. Lakin
rəhbərlikdən onlara icazə verilməyib. Məsələ ilə bağlı gimnaziyanın
direktor müavini Zümrüd İmanova ANS PRESS-ə açıqlamasında bildirdi
ki, heç bir narahatçılıq keçirməyə ehtiyac yoxdur. Hələlik onlara
binanın sökülməsi barədə rəsmi bildiriş verilməyib. Gimnaziyanın
direktoru Mahizər Şabanbəyova isə açıqlmasında bildirib ki, məsələ
barədə Təhsil Nazirliyinə müraciət edib. Lakin hələlik nazirlikdən
konkret bir cavab gəlməyib. "Müəllimlər tərəfindən bütün aidiyyati
instansiyalara məktub göndərilib, mən özüm də məsələyə aydınlıq
gətirmək üçün təhsil nazirliyinə məktub göndərmişəm. Bizə deyiblər
ki, məsələ araşdırılır və bir həftəyə sizə məlumat veriləcək", -
deyə M. Şabanbəyova vurğulayıb
Gimnaziyanın müəllim heyəti işsiz qalmaqdan çox narahatdır.
Şikayətşiləri təmsil edən İlqar Əkbərov deyir ki, məsələ ilə bağlı
Təhsil Nazirliyində qəbulda olublar.
"Təhsil Nazirliyində bizi əmin etdilər ki, gimnaziyanın bağlanma
söhbəti yoxdur. Müəllimlərdən də heç kim ixtisara düşməyəcək.
Sadəcə məktəbə yeni bina verilməsi planlaşdırılır. Məsələ haqqında
daha ətraflı və rəsmi cavabı isə bir həftəyə verəcəklər", - deyə
İlqar Əkbərov bildirib.
Bu sözlərə baxmayaraq şikayətçi müəllimlər çox həyəcanlı idi.Onlar
bildirdilər ki, artıq musiqi şöbəsindən başqa bütün şöbələrə qəbul
dayandırılıb. Gimnaziyanın müdir müavini bu məlumatı təsdiqləməsə
də, müəllimlər elə onun yanında bunun səhv olduğunu və qəbulun
dayandırıldığını düşünürlər.
Qeyd edək ki, 1959-cu ildə yaranan Respublika İncəsənət Gimnaziyası
ilk öncə musiqi məktəbi kimi fəaliyyət göstərib. Hazırda gimnaziya
Milli Konservatoriyanın nəzdindədir.
Hazırda gimnaziyanın II korpusunda 100 sinif otağı, 458 şagird və
257 müəllim heyəti fəaliyyət göstərir. Gəzən söz-söhbətə görə,
gimnaziya binası sökülüb, konservatoriya binasına qatılacaq.
Məsələ ilə bağlı Milli Konservatoriyanın prorektoru Akif Quliyev
açıqlamasında məlumatı təqdiqlədi.
"Ümumiyyətlə o bina qarışıq binadır. Mütəxəssislərlə
məsləhətləşmədən sonra məlum oldu ki, qəzalı vəziyyətdə olan
binanın sökülməsi daha məqsədəuyğundur".
Bina söküləndən sonra gimnaziyanın digər şöbələrində çalışan
müəllim heyətinin aqibətinə gəlincə, A.Quliyev bu məsələnin onlara
aid olmadığını bildirib.
"Bizə maraqlı olan musiqi şöbəsidir. Digər şöbələrə məxsus
aidiyyati qurumlar var ki, onların da o şöbələri qəbul edib
etməyəcəyi öz işləridir".