"Associated Press" (AP) agentliyi cihad məqsədi ilə Kosovodan
Suriyaya getmiş ata və oğulun taleyi ilə bağlı araşdırma aparıb.
İslamçılara qoşulmağa qərar verən ata 8 yaşlı oğlunu da özü ilə
götürüb. Yalnız Kosova xüsusi xidmət orqanlarının müdaxiləsindən
sonra uşağı geri qaytarmaq mümkün olub. "Mən elə bildim ki, ərim
oğlunu özü ilə birlikdə tətilə aparır, mənə demişdi ki, bir neçə
gün istirahətdə olacağıq. Üç gün sonra isə ərim Arbendən SMS atdı.
Yazmışdı ki, biz Suriyadayıq", 30 yaşlı Pranvera Zena Abazi
agentliyə açıqlamasında belə deyib. Gənc ana oğlu Eriona yenidən
qovuşub. Kosova rəsmiləri sadəcə onu qeyd ediblər ki, keçirilmiş
əməliyyat "incə və təhlükəli" olub. Zena Abazi deyib ki, yeganə
uşağı olan oğlu ilə görüşü təsvir etmək üçün o, münasib söz tapa
bilmir: "Dedilər ki, gedək, sənin oğlun vətənə gətirilib".
Agentlik qeyd edir ki, bəzi islamçılar elə zənn edirlər ki, onlar
xilafətdə öz övladları ilə daha xoşbəxt yaşaya bilərlər. Ona görə
də savaşa uşaqları ilə birlikdə getməyə üstünlük verirlər.
Zena Abazi isə oğluna görə çox narahat idi. Ona görə də Facebook-da
səhifə açaraq fəaliyyətə başlayıb. Kosovo və Albaniya mediasına
müsahibələr verib. Son vaxtlar adı çəkilən ölkələrdən Suriya və
İraqa gedən gəclərin çoxalması səbəbindən bu qadının çağrışları
cəmiyyət tərəfindən xüsusi həssaslıqla qarşılanıb.
Kosovo mediası iddia edir ki, 8 yaşlı uşağı Suriayada döyüşmüş bir
kosovolu özü ilə birlikdə vətənə gətirib. Törətdiyi əməldən peşiman
olan həmin islamçı günahını etiraf edərək dövlətdən əfv olunmasını
xahiş edib. Rəsmi şəxslərsə Kosovo mediasının ortaya atdığı bu
iddianı nə təsdiq, nə də təkzib edirlər.
Agentlik bildirir ki, uşaq Kosovoya Türkiyədən havaya qalxan uçaqla
gətirilib. Uşağın atası Arben Zenanın İraqda döyüşdüyü ehtimal
edilir. Abazi Zena bildirib ki, uzun müddətdir ki, ərindən heç bir
xəbər gəlməyib.
"Associated Press" agentliyi xatırladır ki, bu günlərdə Morokodan
Suriyaya uçmaq istəyən bir islamçı saxlanılıb. O, 2 və 4 yaşlı
qızlarını da xilafətə aparmaq istəyirmiş. Maraqlıdır ki, uşaqların
anası fransızdır və ərinin bu istəyindən xəbərsiz olub. Kosovolu
ana deyib ki, onun oğlu futbol oynamağı sevir: "Mən onun hər bir
arzusunu yerinə yetirməyə hazıram. Oğlumun xöşbəxtliyi mənim üçün
hər şeydən üstündür. Onunla yenidən bir yerdə olmaqdan gözəl heç nə
ola bilməz".