İyulun 31-də respublika daxili işlər orqanlarının cari ilin birinci yarısında cinayətkarlıqla mübarizə, ictimai qaydanın qorunması və ictimai təhlükəsizliyin təmin edilməsi üzrə fəaliyyətinin yekunlarına və qarşıda duran vəzifələrə həsr olunmuş geniş Kollegiya iclası keçirilmişdir.
İclası giriş sözü ilə açan daxili işlər naziri,
general-polkovnik Ramil Usubov bildirmişdir ki, Azərbaycan
Respublikasının Prezidenti cənab İlham Əliyev tərəfindən böyük
uğurla davam etdirilən Heydər Əliyev siyasi kursu, ölkə həyatının
bütün sahələrində əldə olunmuş irəliləyişlər qanunla müəyyən
edilmiş funksiyaların 2012-ci ilin 6 ayında da layiqincə yerinə
yetirilməsini şərtləndirmişdir.
Cinayətlərin qarşısının alınması və açılması, ictimai asayişin
təmini sahəsində əvvəlki illərin müsbət nəticələri inkişaf
etdirilmiş, insan hüquq və azadlıqlarının qorunması işi daha da
yaxşılaşmış, kriminogen durum nəzarətdə saxlanılmışdır. Möhtərəm
dövlət başçımızın xüsusi diqqət və qayğısı sayəsində sahəvi
xidmətlərin, orqan və hissələrin yeni informasiya texnologiyaları
ilə təmin olunması, şəxsi heyətin sosial müdafiəsinin və iş
şəraitinin daha da yaxşılaşdırılması istiqamətində tədbirlər davam
etdirilmişdir.
Daxili işlər nazirinin müavini, polis general-leytenantı Vilayət
Eyvazov geniş məruzə ilə çıxış edərək qeyd etmişdir ki,
polis-vətəndaş münasibətlərinin daha da dərinləşdirilməsi
istiqamətində görülmüş işlər, elmi-texniki tərəqqinin ən son
nailiyyətlərindən, statistik, axtarış, kriminalistik və digər
uçotlardan geniş istifadə edilməsi profilaktiki işin səmərəsini
xeyli artırmışdır.
Hesabat dövründə qarşıda duran başlıca vəzifələrdən biri cinayət və
hadisələr barədə məlumatlara operativ və məqsədyönlü reaksiya
verilməsi olmaqla, vətəndaşların polis orqanlarının növbətçi
hissələrinə etdikləri 77.000 müraciət üzrə qanuni tədbirlər
görülmüş, "102" xidməti tərəfindən məişət zəminində baş vermiş 4000
hüquqazidd əməlin qarşısı alınmış, 7 mindən çox vətəndaşa hüquqi
yardım göstərilməsi təmin edilmişdir. "Təhlükəsiz Şəhər" sisteminin
imkanlarından daha səmərəli istifadə edilmiş və aşkarlanmış
hadisələrin sayı ötən ilin 6 ayı ilə müqayisədə 1,5 dəfə yaxud 1264
fakt çox olmuşdur. Nəticədə 3473 yol-nəqliyyat hadisəsi, 258
ictimai asayişin pozulması, 79 avtoxuliqanlıq, 41 yanğın, axtarışda
olan 61 avtomobil və s. müəyyən edilmiş, 28 cinayətin üstü
açılmışdır. Qanunsuz saxlanılan 582 odlu silah, 26 mindən çox
sursat götürülmüşdür.
Həyata keçirilən kompleks tədbirlər cinayətlərin, onların müxtəlif
növlərinin, habelə ayrı-ayrı subyektlərinin kriminal aktivliyinin
azalması, bütövlükdə əməliyyat-xidməti fəaliyyətdə pozitiv
nəticələrin əldə edilməsi ilə səciyyəvi olmuşdur. Hesabat dövründə
daxili işlər və prokurorluq orqanları üzrə qeydə alınmış cinayətlər
1,5 faiz, onların strukturunda qəsdən adam öldürmə və ona cəhdlər
3,8 faiz, odlu silahın tətbiqilə törədilənlər 15,9 faiz,
quldurluqlar 33,3 faiz, soyğunçuluqlar 3,5 faiz, oğurluqlar 18,4
faiz, cibgirliklər 28 faiz, yol-nəqliyyat hadisələri 6,3 faiz
azalmışdır. Həmçinin yetkinlik yaşına çatmayanların hüquqazidd
əməlləri 7,2 faiz, qrup halında baş verən cinayətlər 5,8 faiz, o
cümlədən əvvəllər məhkum olunmuşlardan ibarət qrupların törətdiyi
cinayətlər 25,3 faiz az olmuşdur.
Nazir müavini vurğulamışdır ki, bütün uçot subyektləri üzrə 11.953
cinayət qeydə alınmış və onların 95 faizi (11.343-ü) daxili işlər
və prokurorluq orqanlarının səlahiyyətləri çərçivəsində istintaqı
və təhqiqatı aparılan hüquqazidd əməllər olmuşdur. Təsnifatına görə
həmin cinayətlərin 89 faizini böyük ictimai təhlükə törətməyən və
az ağır, yalnız 11 faizini ağır və xüsusilə ağır növlər təşkil
etmişdir.
Cinayətlərin açılması 3,8 faiz yaxşılaşaraq 87,2 faizə yüksəlmiş,
açılmış cinayətlərin sayı 10 faiz və ya 861 fakt çox olmuşdur.
Bununla yanaşı, ağır və xüsusilə ağır cinayətlərin açılması 7,5
faiz, qəsdən adam öldürmələrin açılması 8,9 faiz, hədə-qorxu ilə
tələb etmələrin açılması 12,5 faiz, quldurluqların açılması 4,9
faiz, soyğunçuluqların açılması 8,1 faiz, oğurluqların, o cümlədən
cibgirliklərin açılması müvafiq olaraq 10,2 və 14,3 faiz,
bütövlükdə mülkiyyət əleyhinə cinayətlərin açılması 10,5 faiz
yaxşılaşmışdır. Prokurorluq orqanları ilə birgə keçmiş illərdən
bağlı qalmış 212, habelə əməliyyat planlarının vaxtında tətbiqi
nəticəsində "isti izlərlə" 487, elmi-texniki vasitələrlə 1796
cinayət açılmışdır. Bu işdə vətəndaşlarımızın da rolu böyük olmuş
və onlar 2000-dən çox cinayətin açılmasında yaxından iştirak
etmişlər. Həyata keçirilmiş əməliyyat-axtarış tədbirləri ilə 1030
nəfəri birləşdirən 396 cinayətkar qrup, eləcə də 49 nəfərdən ibarət
9 mütəşəkkil dəstə zərərsizləşdirilmiş, qanunsuz odlu silah
saxladığına və daşıdığına görə 55 nəfər cinayət məsuliyyətinə cəlb
olunmuşdur.
Təqsirləndirilən şəxslərin axtarışında da müsbət təmayül qeydə
alınmış və bu işin göstəricisi 2,8 faiz yaxşılaşaraq hesabat
dövründə 51,2 faiz təşkil etmişdir. Yerli, dövlətlərarası və
beynəlxalq axtarışda olan 1053, o cümlədən MDB və digər xarici
ölkələrdə gizlənmiş 47 təqsirləndirilən şəxs tutulmuş, İnterpolun
Milli Mərkəzi Bürosu tərəfindən 48 nəfərin və bu təşkilata üzv
ölkələr tərəfindən axtarılan 23 şəxsin yeri
müəyyənləşdirilmişdir.
Transmilli mütəşəkkil cinayətlərdən olan narkotraffikə və insan
alverinə qarşı mübarizədə görülən işlər də davamlı olmuşdur.
Qanunsuz dövriyyədən 317 kiloqramdan çox narkotik vasitə
çıxarılmış, 63 nəfərdən ibarət 26 cinayətkar qrup və dəstə
zərərsizləşdirilmiş, 27 kiloqram narkotikin qaçaqmalçılıq yolu ilə
ölkəyə gətirilməsinin qarşısı alınmışdır. "Xaş-xaş"
əməliyyat-profilaktik tədbirləri çərçivəsində ümumi çəkisi 236 tona
yaxın narkotik tərkibli bitki yaşıl kütlə halında məhv
edilmişdir.
İnsan alverinə qarşı mübarizə üzrə Milli Fəaliyyət Planı əsasında
həyata keçirilən tədbirlərlə 65 (+2) fakt aşkarlanmış, 10 nəfərdən
ibarət 4 cinayətkar qrup zərərsizləşdirilmişdir. Bu növ hüquqazidd
əməllərin qurbanı olan 35 şəxs müəyyən olunaraq cəmiyyətə
reinteqrasiyası təmin edilmişdir.
Dövlətin iqtisadi təhlükəsizliyinin qorunması sahəsində həyata
keçirilən əməliyyat tədbirləri ilə 7 saxta pul hazırlama və ya
satma cinayəti aşkarlanmış və qeyri-leqal dövriyyədən ümumi məbləği
22 min manat təşkil edən 2167 ədəd əskinas çıxarılmışdır.
Bildirilmişdir ki, cinayətlərdən zərər çəkmiş şəxslərin
hüquqlarının bərpasında mühüm funksiyaları yerinə yetirən istintaq
və təhqiqat aparatı əməkdaşlarının fəaliyyəti də qənaətbəxş
olmuşdur. Müstəntiqlər tərəfindən ötən ilin 6 ayı ilə müqayisədə
0,7 faiz çox, yəni 11.497 cinayət işinin istintaqı aparılmış,
onlardan 42,5 faizi ittiham aktı ilə məhkəmələrə göndərilmişdir.
Vətəndaşlara və dövlətə dəymiş milyonlarla manat maddi ziyandan
92,5 faizi ödətdirilmişdir ki, bu da ötən ilin müvafiq dövrü ilə
müqayisədə 14,5 faiz çoxdur.
Fəaliyyətin əsas istiqamətlərindən olan yol hərəkəti
təhlükəsizliyinin təmin edilməsi sahəsində texniki sistemlərin
tətbiqinin və inzibati tənbehlərin sərtləşdirilməsinin hadisələrin
qarşısının alınmasına müsbət təsiri olmuşdur. Qəzaların sayında
qeydə alınmış 6,3 faiz azalma əsasən sürət həddinin aşılması və
nəqliyyat vasitəsinin sərxoş vəziyyətdə idarə olunması kimi
xətaların profilaktikasının gücləndirilməsindən irəli gəlmişdir.
Ümumilikdə yol hərəkətinə nəzarət prosesində 10,2 faiz çox və ya
450 minə yaxın qayda pozuntusu müəyyən edilmiş, 1013 şəxsin
sürücülük hüququ müxtəlif müddətlərə məhdudlaşdırılmışdır.
Avtoxuliqanlıq etdiyinə görə 299 nəfər, şüşələrinə pərdə və plyonka
çəkmiş 4530 sürücü barəsində qanunauyğun ölçülər götürülmüşdür.
Məruzədə Azərbaycan Respublikasının Prezidenti, Silahlı Qüvvələrin
Ali Baş Komandanı cənab İlham Əliyevin xüsusi diqqət və qayğısı ilə
əhatə olunmuş Daxili Qoşunların da ictimai asayişin keşiyində
ayıq-sayıq dayandığı, qarşıya qoyulmuş məsul tapşırıqları yüksək
səviyyədə yerinə yetirdiyi qeyd olunmuşdur.
Polis general-leytenantı Vilayət Eyvazov müraciətlərə baxılması və
vətəndaşların qəbulu üzrə fəaliyyətin də məqsədyönlü şəkildə davam
etdirildiyini, hesabat dövründə 17.544, o cümlədən elektron poçt
ünvanına daxil olmuş 3550 ərizə və şikayətin araşdırıldığını, bütün
müraciətlər üzrə təşəbbüskarların yazılı məlumatlandırıldığını,
hüquqlarının izah olunduğunu diqqətə çatdırmışdır. O, qeyd etmişdir
ki, Nazirliyin rəhbərliyi və struktur xidmətləri tərəfindən
1500-dən çox vətəndaş qəbul edilmiş və qaldırılan məsələlərin
əksəriyyəti yerində həllini tapmışdır. Həyata keçirilən bu və digər
vacib tədbirlərin, xüsusən qanunçuluğun möhkəmləndirilməsinin
müsbət nəticələrindən biri də polis əməkdaşlarından şikayətlərin
sayının 30 faiz, Azərbaycan Respublikası Prezidentinin
Administrasiyasına daxil olmuş şikayətlərin isə 25,5 faiz
azalmasıdır.
Azərbaycan Respublikası Prezidentinin 2011-ci ildə imzaladığı
Fərmana uyğun olaraq əhaliyə göstərilən 25 elektron xidmət dövlət
qeydiyyatına alınmış, 478 əməkdaşa elektron imza sertifikatı
verilmiş, Nazirlik, Elektron Hökumət Dövlət İnformasiya Sisteminə
(EHİDS) qoşulmuşdur. Hazırda hər bir elektron xidmətin Hüquqi
aktların dövlət reyestrinə daxil edilməsi üzrə iş aparılır.
Məruzə ətrafındakı müzakirələrdə çıxış edənlər görülmüş işlər və
fəaliyyətdə yol verilmiş nöqsanlar, eləcə də, onların aradan
qaldırılması üzrə həyata keçirilən tədbirlər barədə
danışmışlar.
İclasa yekun vuran general-polkovnik Ramil Usubov daxili işlər
orqanlarının hesabat dövründəki fəaliyyətinin bütövlükdə qənaətbəxş
olduğunu, qanunla müəyyən edilmiş vəzifələrin layiqincə yerinə
yetirildiyini, eyni zamanda, əməliyyat-xidməti fəaliyyətdə bəzi
nöqsanların qaldığını nəzərə çatdırmışdır.O, ərazi polis
orqanlarının rəislərindən qanunçuluğun daha da
möhkəmləndirilməsini, şəxsi heyətin peşəkarlığının artırılması
istiqamətində tədbirlərin davamlı və məqsədyönlü aparılmasını, gənc
əməkdaşların işlədiyi sahənin bacarıqlı mütəxəssisləri kimi
yetişmələri üçün lazımi şəraitin yaradılmasını, onlara diqqətin
artırılmasını tələb etmişdir.
General-polkovnik Ramil Usubov vətəndaşların müraciətlərinə
baxılmasının keyfiyyətinin yüksəldilməsi, yeni informasiya
texnologiyalarının imkanlarından səmərəli istifadə olunması ilə
bağlı konkret tapşırıq və tövsiyələrini vermişdir.
Daxili işlər naziri əmin olduğunu bildirmişdir ki, cari ili yüksək
göstəricilərlə başa vurmaq üçün şəxsi heyət cinayətkarlığa qarşı
mübarizə və ictimai asayişin təmini sahəsində Azərbaycan
Respublikasının Prezidenti cənab İlham Əliyev tərəfindən qarşıya
qoyulan mühüm vəzifələri, eləcə də zati-alilərinin ölkədə hüquq
qaydasının və qanunçuluğun möhkəmləndirilməsi, əməliyyat-xidməti
fəaliyyətin təkmilləşdirilməsi ilə bağlı tələb və tapşırıqlarını
tam həcmdə yerinə yetirəcək, sabitliyin, əmin-amanlığın, dövlətin
və vətəndaşların qanuni mənafelərinin hüquqazidd əməllərdən
qorunmasında qüvvə və bacarığını əsirgəməyəcək, əldə olunmuş müsbət
nəticələri daha inkişaf etdirəcəkdir. Bunun üçün əməkdaşların və
hərbi qulluqçuların kifayət qədər peşəkar hazırlığı, təcrübəsi,
bilik və bacarığı, ən əsası, ölkə rəhbərliyinin daxili işlər
orqanlarının maddi-texniki təminatının, sosial və məişət şəraitinin
daha da yaxşılaşdırılmasına yönəlmiş iradəsi, vətəndaşlara diqqət
və qayğıdan irəli gələn hərtərəfli dəstəyi vardır.