Əməkdar artist, Akademik Milli Dram Teatrının aktrisası Mehriban Xanlarovanın Gün.Az-a müsahibəsi:
- Son günlər haqqınızda xoşagəlməz xəbərlər
yayılmaqdadır.
Etibar Süleymanov adlı şəxs sizinlə rəsmi nikahda olmasını iddia
edib. Mətbuatda sizin ona 42 min manat borcunuz olması ilə bağlı
açıqlama verib. Bütün bunlarla bağlı nə deyə
bilərsiniz?
- Məhkəmə, qayda-qanun var. Məni fırıldaqçı kimi qələmə verir, guya
onun pulunu yemişəm. Vallah, yalan söhbətdir. Bu adamın cibində
hətta 20 qəpiyi də yoxdur. Onun bu əməlləri ilə bağlı Daxili İşlər
Nazirliyinin 102-i nömrəsinə zəng vurub, şikayət etmişəm. O gün
müğənni Səidə Sultan efir vasitəsilə dedi ki, o adamın hətta özünə
siqaret almağa cibində pulu yoxdu.
- Bu adamla, sizə etdiyi əməllərlə bağlı aidiyyatı
orqanlara müraciət etmisiniz?
- Hə, şikayət etmişəm. Zəng elədim polisə dedim ki, bəsdi artıq. Bu
adam orada-burada deyir ki, mənimlə bağlı yuxarılara şikayət
edəcək. Adama deyərlər ki, ay qardaş get işinlə məşğul ol. Axı sən
kimsən ki, gəlib ortalığa düşmüsən?
Utanmır ona zəng edir, buna zəng edir. Mənə keçən dəfə ismarış
göndərib ki, sənin məndə gəlinlik şəkillərin var. Ona dedim ki,
bəyəm, səninlə toyum olub? Gəlinlikdə sənin yanında dayanmışam?
Aktrisayam, mənim gəlinlik paltarında şəklimin olması isə çox
normal haldır. Allaha and içirəm ki, mənim belə adda ərim
yoxdur.
- Doğrudur ki, özünü sizin həyat yoldaşınız kimi təqdim
edən adam tərəfindən döyülmüsünüz?
- Bu məsələ ilə bağlı ATV-nin canlı efirinə çıxdım. Makiyajsız
verilişdə oldum, hamı üzümü gördü. Döyülən adam xəsarət alar da.
Camaat gördü ki, mənim heç yerimdə yara-filan yoxdu. Dedi-qodunu
yayan adamlara sübut elədim ki, kiminsə tərəfindən döyülən adam
efirdə yox, xəstəxanada olar. Yeri gəlmişkən, mən yeni seriala
çəkilirəm, orada elə bir səhnə vardı ki, guya məni döyürlər.
- Bəs yaxşı, bu adamın sizinlə nə problemi
var?
- Bu adam tanınmışların nömrələrini tapıb, onlara zəng edir, özünü
nüfuzlu, imkanlı biri kimi təqdim edir. İnsanlara özünün imkanlı
bir məmur oğlu kimi tanıdır, milyonçu olduğunu deyir. Tanış olur,
bir müddət keçəndən sonra onlardan sui-istifadə edir.
Hərəsinə bir yalan satıb, onlardan pul alır. Məsələn, birinə deyib
ki, atam burada yoxdu, mənə 2 min manat lazımdı. Digərinə isə başqa
bir yalan uydurub... Kim ki, onu sevib, inanıb, həmin məbləği ona
verib. Mənimlə də eyni şeyləri eləmək istəyirdi, gördü ki,
alınmır.
Firəngiz Mütəllibovaya da ismarışlar yazırmış. Firəngiz xanım həmin
ismarışları silməyib, saxlayır. Mənə hədə-qorxu zəminində SMS-lər
yazıb. Həmin mesajları hüquq-mühafizə orqanlarına təqdim etmişəm
artıq.
- Qəribədir ki, həmin adama ərə getmənizlə bağlı xəbərlər
də yayıldı...
- Onun əməlləridir, haqqımda yalandan müxtəlif şayiələr yayıb. Belə
şeylərə uymayın, inanmayın. Sən demə, bu adam gedib, Şüvəlanda - öz
kəndlərində deyirmiş ki, Mehriban Xanlarova özünün sürdüyü
"Jeep"ini mənə bağışlayıb. Öz maşınımı niyə o adama hədiyyə
etməliyəm?!
- Toyla bağlı dəvətnamələr də paylanmışdı
axı...
- Sizə deyirəm ki, hamısı yalandı. Ona deyən gərək, niyə axı mən o
dəvətnamələri heç görmədim? Yalandan yazıb, tarix də qoyar, ondan
hər nə desən gözləmək olar. Başqa adla kəbin kağızının sürətini
saytlara yayan adamdı bu, nə desən gözlənilər ondan. O, Etibar
Süleymanov olduğu halda, başqa adlarla işlər çevirir.
- Etibar Süleymanovla əlaqə saxlayıb, hərəkətlərindən
dolayı izahat istəyib, xəbərdarlıq etmisiniz?
- Mən heç o adamın səsini belə eşitmək istəmərəm. Axı o, kimdi ki?!
O, mənə heç nə demir. Sadəcə, orada-burada danışır ki, Mehribanın
mənə 42 min manat borcu var, qaytarsın. Mənə ismarış yazır ki, gör
sənə hələ nələr edəcəyəm. Mənim Allahdan başqa heç kimdən qorxum
yoxdur.
İnsanlar var ki, mənə dəstək olurlar. O gün bir toy
məclisindəydim. Naxçıvanlı bir qadın mənə deyir ki, sən nə
istəyirsən ona edək. Amma mən bu işi hüquq-mühafizə orqanlarının
köməkliyi ilə yoluna qoyacağam.