Movqe.Az bildirir ki, 7 milyard əhalisi olan dünyada 43 milyon insan başqa ölkələrdə özünə yeni bir həyat qurmaq üçün əlindən gələni edir. Döyüşlər, çaxnaşmalar, fəlakətlər, aclıq, yoxsulluq insanları evlərindən, yurdlarından ayırır. Dünya qaçqın problemi ilə başa çıxmağa çalışır. Dünya daxilində şiddət və vətəndaş müharibələri artdıqca, ölkələrini tərk etmək məcburiyyətində qalan qaçqınların sayı da artır. Birləşmiş Millətlər Təşkilatı qaçqınların sayının 43 milyona çatdığını açıqlayıb. Yaşamaq üçün etibarlı bir yer axtaran qaçqınlar, əvvəl qonşu ölkələrə, sonra da bir ümid kimi Avropaya getməyə çalışırlar. 10 minlərlə qaçqın üçün bu, Aralıq dənizi üzərindən təhlükə ilə dolu bir səfər deməkdir. İqtisadi borc batağındakı Avropa üçün isə qaçqınlar, gündən-günə böyüyən bir problemə çevrilib. Buna görə də, ciddi qaçqın siyasəti tətbiq edir. İnsan Hüquqları sahəsində müsbət bir cədvəl çəkən, edam cəzaları və işgəncəyə qarşı dayanan Avropa Birliyi mühacirlərin problemini sərt tədbirlərlə həll etməyə çalışır. Yalnız Almaniyada keçən il təxminən 55 min qaçqın sığınacaq tələb edib. Bunların təkcə 935-i qəbul edilib. Tətbiq olunan siyasətlərdən əlavə, bu qaçqınlar az bir gəlirlə pis şərtlərdə yaşamağa məhkum edilir. Köç etdikləri ölkələrdə təhsil sistemindən faydalana və iş tapa bilmirlər. Qısacası, Avropaya çata bilən qaçqınlar xəyallarındakı rifah dolu həyatdan uzaq bir həyat sürürlər.