Dünən Azərbaycanın İstanbuldakı baş konsulluğu İstanbuldakı Sarıyer rayonunda ulu öndər Heydr Əliyevin möhtəşəm abidəsinin önündə anım mərasimi keçirib. Mərasimdə konsulluğun əməkdaşları, iş adamları, deputatlar, İstanbulda təhsil alan tələbələr, şəhər ictimaiyyətinin nümayəndələri və Türkiyənin aparıcı kütləvi informasiya vasitələrinin təmsilçiləri iştirak ediblər. Tədbir Azərbaycanın dövlətinin himni ilə başlanıb. Mərasim iştirakçıları xalqımızın ümummilli liderinin abidəsinin önünə əklil və tər çiçək dəstələri qoyublar.
Azərbaycanın İstanbuldakı baş konsulu Həsən Zeynalov mərasimi açaraq ulu öndərin həyat və fəaliyyəti barədə tədbir iştirakçılarına geniş məlumat verib. O bildirib ki, türk dünyasının dahi şəxsiyyəti, Azərbaycan dövlətinin qurucusu Heydər Əliyev zəngin və mənalı həyatını xalqının rifahına və xoşbəxtliyinə həsr edib: " Ulu öndər istər Azərbaycana rəhbərlik etdiyi, istərsə də Sovet İttifaqının liderlərindən biri olduğu zaman daim öz doğma vətəninin inkişafı üçün çalışmışdır".
Mərasimə qatılmış Milli Məclisin deputatları Eldar İbrahimov və Fəttah Heydərov, TURGAS şirkətinin rəhbəri Erdal Aksoy, İstanbuldakı Türkiyə-Azərbaycan Dərnəyinin sədri Səfər Qaraqoyunlu ümummilli liderin Azərbaycan və türk dünyası qarşısında misilsiz xidmətlərindən bəhs ediblər.
İstanbulun Sarıyer bələdiyyəsinin sədri Şükrü Genç çıxışında türk dünyasının, Türkiyənin fəxri olan Heydər Əliyevin tarixdə bir qurucu, gələcək nəsillərə örnək siyasətçi kimi qalacağını deyib: "Ulu öndərin xatirəsi hər zaman ürəklərdə yaşayacaqdır". Mərasim başa çatdıqdan sonra Azərbaycanın İstanbuldakı baş konsulluğunda Heydər Əliyevin həyat və fəaliyyətinə həsr olunmuş elmi konfrans keçirilib. Konfransada İstanbuldakı ali təhsil ocaqlarının nümayəndələri ulun öndərin şəxsiyyətini zəngin fəaliyyəti ilə bağlı məruzələrlə çıxış ediblər.