Bu il Azərbaycanda ali məktəblərin ixtisas qrupları üzrə qəbul planı ilə ərizələrin sayı arasında qeyri-tarazlıq olub.
Bunu Tələbə Qəbulu üzrə Dövlət Komitəsinin (TQDK)
sədriMəleykə Abbaszadəbu gün keçirdiyi mətbuat
konfransında deyib.
O bildirib ki, III qrupda ərizələrin, II qrupda isə plan yerlərinin
nisbi çəkisi böyükdür. Təhlil göstərir ki, ixtisas qrupları üzrə
qəbul planı və ərizələrin nisbi çəkiləri arasında qeyri-tarazlıq
vardır:
"Ümumi qəbul planının II ixtisas qrupu üçün ayrılmış hissəsi
abituriyent ərizələrinin həmin ixtisas qrupuna düşən hissəsindən
böyük, III ixtisas qrupunda isə əksinə, kiçikdir. I və IV ixtisas
qruplarında isə bu iki göstərici arasında, demək olar ki, uyğunluq
mövcuddur.
Qeyd edək ki, respublikamızda texniki ixtisaslara ehtiyac çoxdur.
Deməli, son illər ali təhsil müəssisələrinə tələbə qəbulu planında
edilən dəyişikliklər artıq öz müsbət nəticəsini verməkdədir. Bu gün
I ixtisas qrupunu seçən abituriyentlərin nisbi çəkisi ilə həmin
ixtisas qrupu üçün ayrılmış plan yerlərinin nisbi çəkisi arasında
artıq tarazlıq mövcuddur.
Yalnız II qrupda plan yerlərinin nisbi çəkisi abituriyent
ərizələrinin nisbi çəkisini üstələyib. Bu qrupda plan yerlərinin
çox, ərizələrin sayının isə nisbətən az olması müsabiqə vəziyyətinə
mənfi təsir göstərib.
Nəticədə hazırlıq səviyyəsi o qədər də yüksək olmayan
abituriyentlər ali təhsil almaq imkanı əldə edib. Bu baxımdan,
gələcəkdə ali təhsil müəssisələrinə plan yerləri ayrılarkən mövcud
reallıqlar nəzərə alınmalı, qəbul planında kəskin sıçrayışlar
edilməməli, gələcək perspektivlər müəyyən edilməli, bir sözlə,
uğurlu qəbul planı siyasəti aparılmalıdır".