Bir müddət öncə Azərbaycan Milli Elmlər Akademiyasının (AMEA) Radiasiya Problemləri İnstitutu Beynəlxalq Atom Enerjisi Agentliyi ilə birlikdə "Azərbaycanda tədqiqat nüvə reaktorunun iqtisadi əsaslandırılması" layihəsini hökumətə təqdim edəcəyini bildirmişdi. Radiasiya Problemləri İnstitutunun rəhbəri Adil Qəribov demişdi ki, layihədə ilk növbədə, "reaktor lazımdırmı" sualına cavab veriləcək: "Biz dövlət orqanlarını bu layihənin səmərəliliyinə inandıra bilsək, onda reaktorun inşası ilə bağlı sərəncam və ya qərar ola bilər. Amma indi tədqiqat nüvə reaktorunun qurulması ilə bağlı konkret qərar yoxdur".
Hazırda məsələnin nə yerdə olduğunu öyrənmək üçün Movqe.az saytı Milli Elmlər Akademiyasının Radiasiya Problemləri İnstitutuna müraciət edib. İnstitutun direktoru Adil Qəribov bildirib ki, nüvə tədqiqat reaktorunun Azərbaycanda reallaşdırılması hələlik mümkün deyil: "Dövlətin belə bir qərarı yoxdur. Ümumiyyətlə, Azərbaycanda belə mövzu gündəmdə deyil".
Bununla belə, Adil Qəribov hesab edir ki, nüvə tədqiqat reaktoru Azərbaycan üçün çox vacibdir: "Tədqiqat nüvə reaktoru Azərbaycanda tikilməli olsa, bu prosesin həyata keçirilməsi üçün maksimum 50 nəfər lazımdır. Bizim institutun isə hazırda bu sahəylə bağlı 20 gənc mütəxəssisi var. Əgər bu haqda dövlət qərar versə, ilk növbədə kadr hazırlığına başlamalıyıq. Fikrimcə, kadr hazırlığını vaxtında başa çatdıra bilərik. Hazırda biz başqa ölkələrin proton, neytron mənbələrində, reaktorlarında tədqiqat işləri aparırıq. Bu sahədə bizə dövlət dəstəyi də var. Beynəlxalq qrantlar əsasında bunları icra edə bilirik".