Gülər Əhmədova ilə görüşün vaxtı açıqlandı

15 Fevral 2013 12:07 (UTC+04:00)

Gülər Əhmədova ilə görüş bu gün saat 14:00-da baş tutacaq. Bu barədə məlumatı Movqe.az-a Gülər Əhmədovanın adının çəkilməsini istəməyən vəkili verib. Onun sözlərinə görə, hazırda hazırlıq gedir: "Hazırda mən ora gedirəm. Saat 14:00-da Gülər Əhmədova ilə görüşəcəyik".
Qeyd edək ki, fevralın 13-də Səbail Rayon Məhkəməsində hakim Elnur Həsənovun sədrliyi ilə keçirilən prosesdə G. Əhmədova barəsində istintaq müddətində 2 ay həbs-qətimkan tədbiri seçilib. Səbəb isə fəaliyyəti dayandırılmış Azərbaycan Beynəlxalq Universitetinin sabiq rektoru Elşad Abdullayevin bu ilin sentyabrında yaydığı qalmaqallı video və bundan sonra Bakı şəhər Prokurorluğunda Cinayət Məcəlləsinin 178.3.2-ci (etibardan sui-istifadə etməklə özgənin külli miqdarda əmlakını ələ keçirmə) maddəsi ilə başlanmış cinayət işinin başlanmasıdır. G. Əhmədova cinayət işində təqsirləndirilən şəxs qismində tanınaraq, barəsində polisin nəzarətinə verilmə qətimkan tədbiri seçilmişdi. Onu da qeyd edək ki, Gülər Əhmədova deputat mandatından imtina edib.