Nüvə reaktoruna malik olmayan Azərbaycan müxtəlif radiasiya təhlükəsizliyi ilə üzləşir. Avropa Birliyi respublikaya bu təhlükələri neytrallaşdırmaqda yardım edəcək. Bu barədə Avropa Birliyinin Bakıdakı nümayəndəliyinin rəhbəri, səfir Roland Kobia bəyan edib.
"Radiasiya təhlükəsizliyi yalnız daxildən deyil, həm də xaricdən yarana bilər. Əhalinin bu təhlükələrdən müdafiəsinə ehtiyac var", - deyə R.Kobia Azərbaycan Respublikasının radiasiya təhlükəsizliyi infrastrukturunun gücləndirilməsi və dəstəkləyici xidmətlərinin inkişafı üzrə Twinninq layihəsinin təqdimat mərasimində bildirib.
Bununla yanaşı, R.Kobia Ermənistanda yerləşən Metsamor Atom Elektrik Stansiyası texnologiyasının köhnəldiyini xatırladıb. "Bu stansiya seysmoloji cəhətdən təhlükəli bir ərazidə yerləşir, bu isə Azərbaycan üçün təhdid yaradır. Avropa İttifaqı uzun müddətdir ki, reaktorun dayandırılmasına çalışır", - deyə o vurğulayıb.
Azərbaycandakı yeni layihədən danışan AB-nin nümayəndəsi qeyd edib ki, layihə iki ilə nəzərəd tutulub. Buna baxmayaraq, onun töhfələrindən Azərbaycan əhalisi daha uzun zaman bəhrələnə biləcək.
O həmçinin qeyd edib ki, layihə çərçivəsində radiasiya laboratoriyasının yaradılması planlaşdırılır.
"Bu bizim ilk layihəmizdir. Ümid edirəm ki, Fövqəladə Hallar Nazirliyi ilə birgə son Twinning layihəmiz deyil. Bu cür layihələr Azərbaycanın Avropa inteqrasiyasına kömək edəcək", - deyə təqdimat mərasimində Litvanın Azərbaycandakı səfiri Arturas Jurauskas bildirib.
Fevralın 15-də Bakıda AB-nin radiasiya təhlükəsizliyi sahəsində Azərbaycana yardım göstərməsi üzrə Twinninq layihəsinin təqdimat mərasimi keçirilib.
Layihə Fövqəladə Hallar Nazirliyi FHN Nüvə və Radioloji Fəaliyyətin Tənzimlənməsi üzrə Dövlət Agentliyi, Radiasiya Müdafiə Mərkəzi və Litva layihələrin idarə olunması Mərkəzi Agentliyi ilə birgə reallaşdırılır.
Layihə Avropa Birliyi tərəfindən Litvanın dəstəyi ilə maliyyələşdirilir və iki ilə nəzərdə tutulub. Layihənin məqsədi - Azərbaycanda ionlaşmış şüalanmanın təsirini müşahidə etmək prosesini təkmilləşdirmək, bütün növ şüalanma mənbələri üzərində nəzarətə dair energetika siyasətini möhkəmlətməkdir.
Müqavilənin ümumi dəyəri 950 min avro təşkil edir.