"Ailə qurmaq məsələsi yaxınlarda həll olunacaq, qaldı ana olmağım"- Natəvan

12 İyun 2017 13:36 (UTC+04:00)

Müğənni Natavan Həbibi “ATV maqazin onlarla” verilişinə açıqlama verib.

Movqe.az  xəbər verir ki, sənətçi atasından danışıb, göz yaşlarına boğulub:

"Uşaqlığımın əksər hissəsini atasız keçirmişəm. Anam güclü xanım olduğu üçün bunu bizə hiss etdirmədi. Onun həm analığını, həm də atalığını gördük. Mən də istəyirəm övladımım atası da, anası da olsun. Əlbəttə mən də atamı görmək arzulayıram, onun üçün darıxıram. Amma... Sonuncu dəfə onu 1998-ci ildə görmüşəm. Xalam qızını limanda yola salırdım. Doğma iki göz gördüm, qocalmışdı. İnsanların içində təəccübləndim, dedim “papa”. Mənə baxdı, dedi Natulya... İşi var idi, bura gəlmişdi. Dedim, bizə baş çəkmədən gedirsən? Anamla aralarında inciklik var. Həyat, hər şey ola bilər. Çox şükür həyatdadır, yaşayır. Qocalıb, sağlamlığı ilə bağlı problemləri var. Uzaqda olsa belə əsas odur ki, hər şey yaxşıdır".

Sənətçi ana olmaq arzusunda olduğunu qeyd edib:

"Hər zaman çata biləcəyim şeylərin xəyalını edirəm ki, sonra məyus olmayım. Övlad istəyirəm. Bu, mənim xəyalımdır. Çünki övladımla bağlı xəyallarım var. Özümü ana kimi tam fərqli görürəm. Ailə qurmaq məsələsi yaxınlarda həll olunacaq, qaldı ana olmağım".

big.az