Vaqif Əsədov: "Belə hallarda insanlar ictimai nəqliyyatdan istifadə etsələr, daha yaxsı olar"
Elə insanlar var ki, yağışın yağmasını necə günlərdir arzulayırlar. Fermerlər, əkinçilər, kənd təəssərüfatı ilə məşğul olan insanlar və başqaları... Amma tıxaca nifrət edən səbrsiz insanlar da çoxdur. Elə ötən gün yağan yağış yenidən Bakıda tıxaclara yol açıb. Bəs görəsən Bakıda bir balaca yağış yağarkən insanlar niyə tıxacda qalıb, saatlarla gözləməyə məhkum olur?
Nəqliyyat üzrə ekspert Məzahir Rüstəmov Bakıda yağışın nəqliyyat üçün törətdiyi problemlərin səbəblərindən danışarkən bildirib: "Romantik replika ilə giriş vermək istəyirəm. Yazarlarda həmişə yağış yağan zaman romantik düşüncələr yaranır. Sərnişinlərdə isə xoş əhval ruhiyyə, romantik düşüncülər əvəzinə pesemist fikirlər yaranır. Bu yağışlı havada işə necə gedəcəklərini və yaranmış tıxacları necə qısa zaman çərçivəsində dəf edəcəklərini fikirləşib, həlli yollarını tapmağa çalışırlar. Əlbəttə ki, sərnişinlərin bu cür narahatçılığı təbiidir. Bu da ondan irəli gəlir ki, yollarda tikinti işləri davam edir, bəzi yollarda çatlar əmələ gəlib, bəzi yollar isə birtərəfi bağlanaraq ümumiyyətlə, işləmir. Yollardan istifadə qaydaları düzgün həyata keçirilməməsi, tikinti təmir işlərinin vaxtında başa çatdırılmaması, qurunt suların yollarda yığışıb-qalması, xətlərin pis vəziyyətdə olması və s. bu kimi problemləri sadalamaqla bitib, tükənməz.
Yağışın yağması, bir balaca sərnişin sıxlığının artması və s. hallarda problemlər yaranır. Problemin əsas səbəblərindən biri də Bakıda kanalizasiya sisteminin normal işləməməsi, yollarda yağış və qurunt sularının axıdılması üçün drenaj xətlərinin yetərincə olmamasıdır. Düşən yağıntı qısa bir müddətdə yollarda gölməçələr əmələ gətirir. Təbii ki, belə gölməçələri keçərkən avtomobilin sürətini azaltmaq tələb olunur, nəticədə də tıxaclar baş verir".
"Azəryolservis" ASC-nin mətbuat xidmətinin rəhbəriPünhan Mürsəliyevisə yağış yağan zaman sürücülərin sürəti azaltdığı üçün tıxacların yaranmasını bildirir: "Sürücülər yağışlı havalarda avtomobillərini aşağı sürətlə idarə edirlər, bu da səhər və axşam saatlarında avtomobillərin çoxluğu ilə əlaqədar olaraq yollarda nisbətən ləngimələrə gətirib çıxardır və tıxaclara səbəb olur. Biz sadəcə zamanında avtomobil yollarını təmir edirik, körpülər, yollar tikirik ki, qəzalar, tıxaclar aradan qaldırılsın".
Yağışın nəqliyyatın hərəkətinə törətdiyi fəsadlar barədə Bakı Şəhər Dövlət Yol Polisi İdarəsinin bölmə rəisiVaqif Əsədov isə Movqe.az-a aşağıdakıları bildirib: "Yağışın yaratdığı fəsadlar təbiidir. Doğurdan da bəzi yollarda avtomobillərin yağış zamanı belə demək mümkünsə, sərgilənməsinin şahidi oluruq. Amma əməkdaşlarımız enişli-yoxuşlu yollara, döngələrə nəzarəti gücləndiriblər. Əsasən, Neftçilər prospekti, Rəşid Behbudov küçəsində, Bakıxanov, Tiblisi prospektində və s . yollarda nəzarət gücləndirilib. Hər halda belə hallarda insanlar ictimai nəqliyyatdan istifadə etsələr, daha yaxsı olar. Bizim vəzifəmiz geyimimizi geyinib, yolda dayanıb, xidmətimizi düzgün aparmaqdır. Əslində, yol polisi yolda olub-olmasa belə sürücülər işıqforun göstərişinə düzgün riayət etməlidir. Bəli, yağış bəzən işıqforun iş gedişinə mane olur. Amma hələ ki belə fakt qeydə alınmayıb. Yaxşı olar ki, sürücülər işıqfor işləmədiyi zaman yol nişanlarının tələblərinə əməl etsinlər. Yol nişanları da yoxdusa sağdan yaxınlaşmalı olan nəqliyyat vasitəsinə yol verib, sonra yoluna davam etsinlər ki, yol qəza hadisəsi alınmasın. Qara plyonkalardan, pərdələrdən istifadə etmək olmaz. Yalnız arxa, küləyə qarşı olan şüşəyə plyonka vurmağa icazə var. Ümumiyyətlə qara pərdə və plyonkalar yağışlı havada görüntünü məhdudlaşdırır və qəzalara səbəb olan faktdır".