Səhiyyə Nazirliyi təhlükəli dərmanla bağlı açıqlama verdi

20 Fevral 2013 11:10 (UTC+04:00)
Səhiyyə Nazirliyi dünyada milyonlarla insan tərəfindən istifadə edilən, məşhur ağrıkəsici dərman olan "Diklofenak"ın infarkt və insultun yaranması riskini artırması ilə əlaqədar olaraq onun satışının qadağan ediləcəyi barədə məlumata münasibət bildirib. Nazirliyin Dərman Vasitələrinin Analitik Ekspertiza Mərkəzinin mütəxəssisi Mətanət Maqsudova Mövqe.az-a açıqlamasında bildirib ki, bu dərmanın ölkədə istifadəsi yasaqlanmayacaq: "Böyük Britaniyanın və Kanadanın iki mütəxəssisi  "Diklofenak"-ın satışdan və həyati vacib dərman preparatlarının milli siyahısından çıxarılmasını vacib hesab edən  təkliflə çıxış ediblər. Çünki sözügedən dərman preparatı uzunmüddət istifadədə infakt və ürək-damar xəstəliklərinin yaranma riskini 40 faiz yüksəldir. Böyük Britaniyanın  dərman vasitələrini tənzimləyən orqanın rəsmi nümayəndəsi qeyd edib ki, əksər xəstələr üçün "Diklofenak"-ın ağrı kəsici effekti əlavə təsirlərinin olması riskindən üstündür. Odur ki, bu preparat qısa qutularla mümkün qədər aşağı dozada istifadə etmək tövsiyyə edilir. Yəni bu dərmandan bütün dünyada yenədə istifadə olunacaq. Amma ürək-damar xəstəlikləri olan insalarda risk çox olduğundan ehtiyatla, müddətli yox, qısa kurslarla istifadə olunacaq. Bu dərmanın uzunmüddətli istifadəsi riski 10 faiz  artırır. Və bu dərman 90 faiz ölkələrdə həyati vacib dərmanların milli siyahılarına daxildir. Odur ki, bizdə də istifadə olunacaq".
Xatırladaq ki, Britaniya KİV-lərinin yazdığına görə, dünyada milyonlarla insan tərəfindən istifadə edilən, məşhur ağrıkəsici dərman olan "Diklofenak"ın infarkt və insultun yaranması riskini artırması ilə əlaqədar olaraq onun satışının qadağan ediləcək. Bunu Londondakı Barts tibb və stomatologiya məktəbinin əməkdaşları bildiriblər. Onlar təsdiq edirlər ki, hazırda daha təhlükəsiz alternativlər var.
"Diklofenak" artrit zamanı ağrını aradan qaldırmaq üçün cərrahiyyə əməliyyatından sonra müntəzəm təyin olunan iltihaba qarşı preparatdır. Lakin iki il əvvəl alimlər müəyyənləşdiriblər ki, bu dərman infarkt və insult riskinin 40 faizədək artmasına səbəb olur.
Preparat çoxdandır ki, onun kənar təsirləri ilə bağlı narahatlıqlarını bildirən həkimlərin diqqət mərkəzindədir. 2011-ci ildə alimlər "Diklofenak"ın istifadəsi nəticəsində infarkt və insultdan ölüm riskinin dörd dəfə artmasından bəhs edən tədqiqat dərc etdirmişlər.
Ekspertlər bildirirlər ki, risk qrupuna həmin dərmanı müntəzəm qəbul edən insanlar daxildirlər. Dərmanın birdəfəlik istifadəsi təhlükəli deyildir. Hazırda "Diklofenak" Dünya Səhiyyə Təşkilatının əsas dərman vasitələri siyahısındadır və onu 74 ölkədə almaq olar. Lakin mütəxəssislər bir çox təhlükəsiz dərmanların olduğunu nəzərə alaraq "Diklofenak"ı siyahıdan çıxarmağa çağırırlar.
Dərman vasitələrinin və məhsullarının tənzimlənməsi üzrə Britaniya agentliyinin nümayəndələri qeyd edirlər ki, "Diklofenak" iltihaba qarşı vacib preparatdır. Onlar bildirilər ki, artritin simptomlarını nəzarətdə saxlamaq üçün biz bu dərmanın minimal dozada qısa müddətə təyin edilməsini məsləhət görürük.