Bir yaxşılığın qarşılığı 100 min dollardır
25 Fevral 2013 17:09 (UTC+04:00)
Movqe.az xəbər verir ki, ABŞ-da yaşayan
evsiz Bili Ray Harris, ona pul verən bir qadının səhvən qabına
qoyduğu almaz üzüyü geri qaytarıb. Mətbuatın maraq mərkəzi olan
Harrisin etdiyi davranışın ardınca ona kömək təklifləri yağmağa
başlayıb. Missouri əyalətindəki Kanzas City şəhərində, "yaxşılıq et
yaxşılıq gör" sözünə nümunə olacaq bir hadisə baş verib. Sarah
Darlinq, ötən həftə küçədə gördüyü bir evsizə pul köməyi edib. Gənc
qadın, ertəsi gün almaz üzüyünü itirdiyini anlayıb və kədərlənib.
Darlinq, üzüyünü pul köməyi etdiyi Bili Ray Harrisin qabına
saldığını yada salıb. Darlinq normalda barmağından heç çıxarmadığı
almaz üzüyünü müvəqqəti olaraq pul çantasına qoyduğunu və
üzüyün pullarla birlikdə Harrisin bağışlanan pulları yığdığı qaba
boşalttığını xatırladıb. Darlinq, iki gün sonra bir körpünün
dərinliyində yaşayan Harrisi tapıb. Harris, üzüyü Darlinqin geri
dönməsini gözlədiyi üçün saxladığını söyləyib və geri qaytarıb.
Darlinq mənəvi dəyəri çox yüksək olan üzüyü geri almasından sonra
minnətdarlığını göstərmək üçün Harris adına bir internet saytı
açıb. Yalnız bir həftə ərzində 3.500 -ə yaxın nəfərin pul verdiyi
Harris, təxminən 100 min dolların sahibi olub. Duyğularını hədiyyə
səhifəsində dilə gətirən bir şəxs, "Əgər işsiz olmasaydım daha çox
bağışlayardım. Bili əlindən gələnin ən yaxşısını et və xəyalının
arxasından get. Heç bir zaman çox gec deyil. Xarakterini bu günə
qədər itirmədiyin üçün təşəkkürlər "yazıb.