Elm insanları, yuxusuzluğun insan bədəni və sağlamlığı üzərində çox böyük bir təsirə malik olduğunu bildiriblər. Movqe.Az "Proceedings of the National Academy of Sciences" jurnalının nəşr etdiyi araşdırmaya istinadən bildirir ki, bir həftə ərzində gündə 6 saatdan az yatan insanlarda yüzlərlə genin funksiyası dəyişməyə məruz qalır. "Surrey" Universitetində aparılan araşdırma əsnasında iştirakçılar iki qrupa ayrılıb. Qruplardan birindən bir həftə ərzində gündə ən az 10 saat yatmaları, ikinci qrupdan isə gündə 6 saatdan az yatmaları istənilib. Həftənin sonunda hər iki qrupdan alınan qan nümunələri müqayisə edilərək gündə 6 saatdan az yatan iştirakçılardan 700-dən çoxunun gen funksiyasında dəyişiklər meydana gəldiyi məlum olub. Araşdırmanı idarə edən prof. Kolin Smit, fərqli genlərin dəyişmələrinin bədən kimyasının da dəyişməsinə gətirib çıxardığını bildirib. Bəzi genlərin funksiyasının gün içində təbii olaraq azalıb çoxaldığını ifadə edən prof. Smit, yuxusuzluğun genlərin təbii ritmini pozaraq ya çox az, ya da həddindən artıq işləməsinə səbəb olduğunu vurğulayıb. Prof. Smit, ürək xəstəlikləri, diabet, piylənmə və beyin funksiyalarının pozulması ilə əlaqələndirilən yuxusuzluğun hüceyrə yenilənməsini iflasa uğradaraq ən çox immunitet sisteminə təsir etdiyini də sözlərinə əlavə edib.