QİÇS Mərkəzinin rəhbəri ÜST-ün nümayəndəsinə cavab verdi

26 Fevral 2013 17:53 (UTC+04:00)
Respublika QİÇS-lə Mübarizə Mərkəzinin rəhbəri Esmira Alməmmədova Ümumdünya Səhiyyə Təşkilatının (ÜST)-nın nümayəndəsinin İİV-infeksiyası/QİÇS-lə bağlı açıqlamasına münasibət bildirib. Bu barədə Movqe.az-a danışan E. Alməmmədova bildirib ki, hazırda ölkədə bu təhlükəli xəstəliyə yoluxma hallarına görə, inyeksion narkotik istifadəçiləri siyahıya "başçılıq" edir. Mərkəz rəhbəri bildirib ki, hazırda qeydiyyatda olan İİV-QİÇS-xəstələrinin 61 faizi inyeksiyon yolla yoluxan narkotik istifadəçiləridir. 27-27 faizi isə bu xəstəliyə cinsi yolla yoluxanlardır: "Ötən illərlə müqayisədə cinsi yolla bu xəstəliyə yoluxanların sayında 1-2 faiz artım var. Amma bizdə MDB ölkələrində olduğu kimi, cinsi yolla QİÇS-ə yoluxma halları elə də çox deyil".
E. Alməmmədova bildirdi ki, inyeksiya yolu ilə QİÇS-ə yoluxmuş narkomanlar özləri də bu xəstəliyi cinsi yolla yaya bilirlər. Çünki onların da cinsi partnyorları var. Amma ümumi götürdükdə, ölkədə QİCS-ə yoluxanların sayında artım yoxdur".   
Qeyd edək ki, ÜST-ün Azərbaycan nümayəndəliyinin yoluxucu xəstəliklər üzrə mütəxəssisi Cəvahir Süleymanova APA-ya açıqlamasında bildirib ki, son illər Azərbaycanda  İİV-ə son illər cinsi yolla yoluxanların sayı artır.