Almaniyadan gəlib Xocalı faciəsinə klip çəkdirdi

4 Mart 2013 10:29 (UTC+04:00)

Yaradıcılığını Almaniya və Türkiyədə davam etdirən azərbaycanlı müğənni Seyran İsmayılxan Xocalı faciəsinin 21-ci ildönümü ilə əlaqədar çəkdirdiyi klipini təqdim edib. Movqe.az-in məlumatına görə, klip görkəmli bəstəkar Rauf Hacıyevin "Bahar sənsiz" mahnısına çəkilib. Çəkilişləri 2 gün Şəkidə baş tutan klipdə Xocalı soyqırımından fotolar və kadrlar da yer alıb.

Klipin ideya müəllifi ifaçının özünə məxsusdur. "Buta Film" müğənniyə dəstək olmaq üçün klip xərclərini öz öhdəsinə götürüb. Rejissorlar Ceyhun İbrahimoğlu və Vüqar İslamzadə 21 il əvvəl baş vermiş dəhşətli faciədə iki gəncin acı taleyini musiqinin dili ilə tamaşaçılara çatdırmağa çalışıblar. Klipdə Seyran Xocalı faciəsində sevgilisini itirmiş gəncin obrazını canlandırıb. Onun tərəf müqabili obrazını Vüsalə Vüsatqızı oynayıb.

Qeyd edək ki, Seyran İsmayılxanovun ifasında "Bahar sənsiz" mahnısı martın əvvəli dünyanın bir çox müğənnilərin ifalarından ibarət "Babilon Bar-3" adlı yığma alboma daxil ediləcək.