"Azərbaycan və FAO kasıb ölkələrə yardım üçün əməkdaşlığı genişləndirə bilər"

4 Dekabr 2017 10:32 (UTC+04:00)

Azərbaycan ərzaq təhlükəsizliyinin təmin edilməsinə və aclığın aradan qaldırılmasına ehtiyahı olan ölkələrə dəstək üçün böyük potensiala malikdir.

Movqe.az xəbər verir ki, bunu Trend-ə müsahibəsində BMT-nin Ərzaq və Kənd Təsərrüfatı Təşkilatının (FAO) baş direktorunun müavini və Avropa və Mərkəzi Asiya üzrə regional direktoru Vladimir Rəhmanin bildirib.

Onun sözlərinə görə, Azərbaycan və FAO regionun başqa ölkələrinə və regiondan qırağa bu istiqamətdə əməkdaşlıqlarını genişləndirə bilərlər: "Üstəlik, mən ürəkdən inanıram ki, gələcəkdə Azərbaycan da ərzaq təhlükəsizliyi idarəsinin və kənd təsərrüfatı istehsalı sahəsində öz təcrübə və nou-hau-su ilə digər ölkələrlə bölüşə bilər".

FAO və Azərbaycanın münasibətləri haqda danışaraq V.Rəhmanin vurğulayıb ki, təşkilatın yerli nümayəndəliyi müxtəlif dövlət qurumları ilə sıx əməkdaşlıq edir: "Biz təşkilatın fəaliyyəti, məqsədi və siyasəti barədə ictimaiyyəti məlumatlandırmağa göstərdiyi dəstəyə görə, eləcə də genetik resursların mühafizəsi və Ətraf Mühitin Mühafizəsi naminə Beynəlxalq Dialoq çərçivəsində (IDEA) Azərbaycanın kənd rayonlarının inkişafı sahəsində liderliyinə görə FAO-nun xoşməramlı səfiri Leyla Əliyevaya minnətdarıq.".

 

Regional direktor əlavə edib ki, IDEA və BMT Azərbaycanda davamlı inkişaf məqsədlərinin təbliği sahəsində əməkdaşlıq imkanlarını müzakirə edirlər.

V.Rəhmanin bildirib ki, Azərbaycan hökuməti tərəfindən uğurla həyata keçirilən inkişaf strategiyası əhalinin gəlirlərinin artmasına və ölkədə ərzaq təhlükəsizliyinin təmin edilməsinə gətirib çıxarıb. Bunula belə, qida məhsullarının tələbatı monitorinqi və artımın gecikməsi və qanazlığı problemlərinin həlli üçün insanların rasionunu artırmaq vacibdir.