Rusiyanın Mərkəzi Seçki Komissiyası prezident seçkisinə qatılmaq istəyən 34 nəfərdən müraciət alıb. Dekabrın 21-də bəyan olunub ki, iddiaçıların 18-i seçkiyə müstəqil namizəd kimi, 16-sı siyasi partiyadan qatılır.
Prezident seçkisi 2018-ci il martın 18-də keçiriləcək. Kampaniya dekabrın 18-də start götürüb.
Müstəqil namizədlər mərkəzi seçki qurumuna 2018-ci il yanvarın 7-nə, partiya namizədləri yanvarın 12-nə kimi müraciət edə bilərlər. Qeydiyyat üçün müstəqil namizəd 300 min, partiyalı namizədlər 100 min imza toplamalıdır. Parlamentdə təmsil olunan partiyanın namizədi imza toplamaqdan azaddır.
Rusiya prezidenti Vladimir Putin seçkidə müstəqil namizəd olacaq. Ötən prezident seçkisində Vladimir Putin hakim Vahid Rusiya Partiyasından namizəd idi. Partiyaya baş nazir Dmitri Medvedyev sədrlik edir.
Vladimir Putin 1952-ci il oktyabrın 7-də doğulub. Leninqrad Dövlət Universitetinin hüquq fakültəsini və DTK-nın Moskvadakı 1 saylı Ali Məktəbini bitirib. 1996-cı ildən Rusiyanın ali hakimiyyət orqanlarında işləyib, prezidentin işlər müdirinin müavini, Prezident Administrasiyası rəhbərinin birinci müavini, Federal Təhlükəsizlik Xidmətinin direktoru, Təhlükəsizlik Şurasının katibi olub.
1999-cu il avqustun 16-da baş nazir təyin edilib. 1999-cu il dekabrın 31-dən həmçinin prezident vəzifəsini icra edib. 2000-ci ildə prezident seçilib. 2004-cü il seçkisində bu postu əlində saxlayıb.
2008-ci ilin may ayından Rusiyanın baş naziri olub. 2012-ci ildə yenidən prezident seçilib.