Bir neçə gün əvvəl "Neftçi"
klubunun futbolçusu Araz Abdullayev maşınla iki süpürgəçini vursa
da, hələ də azadıqdadır. Onun futboldan uzaqlaşdırılması ilə bağlı
xəbərlər də təsdiqlənməyib. Belə ki,
Araz Abdullayev aprelin 6-da "Neftçi"nin "Qarabağ"a qarşı keçirdiyi
oyunda iştirak edib. O, 17 nömrəli forma ilə əsas heyətdə meydana
çıxıb.Qeyd edək ki, onun Nobel prospektində vurduğu Xətai rayon
MKİS-in 2 işçisindən biri dünyasını dəyişib, digəri isə ağır
vəziyyətdə xəstəxanada yatır. "Yeni
Müsavat"ın əməkdaşı Travmatologiya İnstitutunda müalicə olunan
Gülsabah Nuriyevanın özü və ailə üzvləri ilə görüşüb. Məlum olub
ki, ağır xəsarətlər alan süpürgəçinin vəziyyəti həkimlər tərəfindən
orta ağır kimi qiymətləndirilir. Hələ onun neçə gün xəstəxanada
qalacağı bilinmir. Süpürgəçi qadının gözlənilən əməliyyatı isə bir
neçə dəfə təxirə salınıb. "Orqanizmim zəif olduğundan həkim hələ
ki, əməliyyat etmir, qolumdan, ayağımdan əməliyyat edəcəklər. Hələ
müalicə olunuram. İmkansızlıqdan çıxmışdım yola, balalarıma çörək
pulu qazanmağa",- deyə qadın ağlayaraq hadisəni anladır. O deyir
ki, yaşadıqları Biləsuvar rayonundan dörd il əvvəl Bakıya gəliblər:
"Qızım ali məktəbə qəbul oldu, mən də onunla gəldim. Yoldaşım
əvvəldən Bakıda işləyirdi, ustalıq edirdi. Deyirdim ki, kirayə
qalırıq, heç olmasa, ailəyə maddi köməkliyim dəysin. Sonu da
belə...".
O, ayda 170-200 manat maaş aldığını söyləyir:
"Buna da şükür edirdim. Əl-ələ verib dolanırdıq birtəhər. İndi də
şükür edirəm ki, heç olmasa ölmədim, sağ
qaldım".
Əlli beş yaşlı Gülsabah Nuriyeva deyir ki, ağır
formada zədələr alaraq xəstəxanaya gətirilib. Onun sol qolu
gibsdədir. Bədənində çoxsaylı xəsarətlər var, şiddətli ağrılardan
şikayət edir. "On gündür buradayam, ölümlə əlləşirəm. Həm də
fikirləşirəm ki, həyat yoldaşım da işindən oldu, on gündür işə
getmir. Bütün günü yanımdadır, dava-dərmanımı alır. Kirayə pulunu
necə verəcəyik, bilmirəm? Ayı 250 manata kirayə qalırıq".
O, digər yoldaşının ölümündən də xəbərsizdir: "Mənə deyirlər ki, başqa xəstəxanada müalicə alır, ölübmü yoxsa?".
Ailəyə edilən maddi köməkliyə gəlincə isə, qadın susur. Sonra deyir ki, iş yoldaşları, rəisi gəliblər xəstəxanaya onu görməyə: "Yanıma gəliblər, yemək bişirib gətiriblər. İşdən də çıxarmayıblar ki, sağalanda gəlib işləyərsən. Ancaq qorxuram bir də işə çıxmağa. Hələ qərar verməmişəm". Onu və iş yoldaşını vuran futbolçunun yardımına gəlincə isə, konkret bir söz demir. "Mən ondan şikayətçi deyiləm, hadisədir, olub. Ancaq mənə sahib çıxsın, müalicə etdirsin məni. Mən onun anası yerindəyəm, o da mənim balam yaşındadır. Onun etdiklərini bağışlayıram. O da vicdansız çıxmasın, elə bilsin mən də anasıyam, yiyə dursun mənə, yardım etsin. Çıxıb qaçmasın, ölməyə qoymasın",- deyə yalvarır çarəsiz qadın. Onun həyat yoldaşı Vidadi Nuriyev də susur, futbolçunun xəsarət yetirdiyi qadının müalicəsinə yardım edib-etmədiyi barədə bir söz demir.
Xatırladaq ki, martın 29-də Bakının Xətai rayonu ərazisində iki qadın avtomobil qəzasının qurbanı olub. Futbolçu Araz Abdullayev idarə etdiyi idman stilli avtomobillə yolu təmizləyən süpürgəçiləri vurub. Qəza nəticəsində təxminən 60 yaşında olan Zəminə Hüseynova ölüb, digəri isə qadın ağır halda xəstəxanaya yerləşdirilib. Araz Abdullayev hadisədən sonra saxlanılsa da, sonradan "Neftçi" klubunun prezidenti Sadıq Sadıqovun zaminliyi ilə azadlığa buraxılıb. Onun məhkəmə işi tamamlana qədər futbol oynamayacağı gözlənilirdi. Bu haqda qərarı "Neftçi" klubunun rəhbərliyi qəbul etmişdi.