Çin istiehsalı olan əşyalardan danışarkən əksəriyyətin ağlına gələn ilk fikir keyfiyyət məhsul olur. Buraya Çində istehsal oluna məhsulların geniş çeşidi, o cümlədən geyim də daxildir. Özü də bəzən bu geyimlərin hazırlanmasında normativlərin kobud şəkildə pozulması hallarına da rast gəlinir. Məsələn, Ümumdünya Səhiyyə Təşkilatı Çində istehsal olunan uşaq paltarlarında icazə veriləndən 900 dəfə artıq formaldehit istifadə olunduğunu bildirərək alıcıları ehtiyatlı olmağa çağırır. Paltarların tərkibində kimyəvi maddələrin olması onun səhhət üçün ciddi təhdid mənbəyi olması deməkdir. Xatırladaq ki, Çindən ölkəmizə də müxtəlif məhsullar, o cümlədən uşaq geyimləri idxal olunur.
Bəs görəsən Çindən Azərbaycana idxal olunan uşaq geyimləri ölkəmizdə monitorinqdən keçirmi? Standartlaşdırma, Metrologiya və Patent üzrə Dövlət Komitəsinin mətbuat katibi Fazil Talıblı Mövqe-az-a açıqlamasında Çində istehsal olunan və Azərbaycana gətirilən uşaq geyimlərinin standarta uyğun olmadığı halda onların satışdan çıxarıldığını bildirib: "Geyimlər Çində istehsal olunubsa bu standartın tələbinə uyğun deyil"- fikri kökündən yanlışdır. Çin Xalq Respublikasında keyfiyyətsiz mallarla yanaşı, çox keyfiyyətli, standartın tələblərinə uyğun uşaq geyimləri də istehsal olunur. Bu gün ölkəmizə Çindən standarta cavab verən, təhlükəsiz uşaq geyimləri gəlir. Lakin çox təəssüf ki, Azərbaycan bazarında nisbət keyfiyyətsiz geyimlərin hesabına dəyişir. Burada satış həcminin artmasında istehlakçıların da rolu böyükdür. İstehlakçıların əksəriyyəti ucuz geyimlərə üstünlük verirlər. Uşaqlar üçün metro keçidlərində, iri topdan satış mərkəzlərdən ucuz və keyfiyyətsiz geyimlər almaqla öz övladlrını təhlükə qarşısında qoyurlar. Biz həmişə məsləhət edirik ki, uşaq geyimləri alarkən alıcılar çox diqqətli olsunlar və ixtisaslaşmış mağazalara üz tutsunlar. Azərbaycanda uşaq geyimləri ilə məşğul olan elə firmalar var ki, onlar həm adları, həm də ki, keyfiyyətləri ilə artıq özlərini təsdiqləyə biliblər. Təbii ki, dövlət qurumu olaraq bizim tərəfimizdən nəzarət aparılır, mütəmadi monitorinqlər keçirilir. Keyfiyyətsiz uşaq geyimləri satışdan çıxarılır və idxalı dayandırılır. Hesab edirəm ki, bu məsələdə kompleks mübarizə aparılmalıdır və alıcılar da çox diqqətli olmalıdılar. Yanvar, fevral, mart ayları ərzində 15 satış məntəqəsindən keyfiyətsiz uşaq geyimlərinin satışdan çıxarılması ilə əlaqədar tərəfimizdən sahibkarlara iradnamə verilib".
Səhiyyə Nazirliyinin mətbuat xidmətinin rəhbəri Anar Qədirli isə Mövqe.az-a məsələ ilə bağlı bildirib: "Geyimlərin standarta cavab verib-verməməsi ilə əlaqədar monitorinqi yalnız Standartlaşdırma, Metrologiya və Patent üzrə Dövlət Komitəsi aparır. Biz ona görə heç bir məsuliyyət daşımırıq. Yalnız saxlanma şəraitinə Səhiyyə Nazirliyi nəzarət edir".