Xalq artistləri İlhamə Quliyeva və Nazpəri Dostəliyeva arasında yaranmış qalmaqalda digər xalq artisti Flora Kərimova günahlandırılır. ANS PRESS-in məlumatına görə, bu fikir xalq artistlərinin bugünki məhkəməsində İ.Quliyevanın vəkili Şəfiqə Nağıyeva və hüquq nümayəndəsi Faiq Ələkbərli tərəfindən səsləndirilib.
Şəfiqə Nağıyeva bu qalmaqalda Flora Kərimovanın birbaşa əli olduğunu iddia etdi: "Flora Kərimova İlhamə xanımla dəfələrlə məhkəmələrdə qarşılaşıb. Onların düşmən münasibətdə olduqlarını hər kəs bilir. Flora Kərimova indi də Nazpəri Dostəliyevanın əli ilə İlhamə xanımı vurmaq istəyir. Bəli, Nazpəri Flora ilə birləşib, İlhamə Quliyevanın nüfuzuna xələl gətirmək istəyir. Hər kəsə gün kimi aydındır ki, onlar İlhamə Quliyevaya qarşı kampaniyaya başlayıblar. Bu danılmazdır!"
Faiq Ələkbərli də eyni fikirləri səsləndirərək, Flora Kərimovanın Nazpəri Dostəliyeva ilə birləşərək İlhamə Quliyevaya qarşı antikampaniyaya başladıqlarını bildirdi.