İsmət Abasovun işdən çıxardığı şöbə müdiri gileyləndi

9 Aprel 2013 15:17 (UTC+04:00)
"Məni heç kəs işdən kənarlaşdırmayıb. Mən öz ərizəmlə işdən getmişəm. Səbəb isə dövlət orqanlarında 65 yaşa çatan imış işçilərin, işdən çıxması ilə bağlı "Dövlət qulluğu haqqında" Qanunda tələbin olmasıdır. Amma istəsəydilər, məni də digərləri kimi işdə saxlaya bilərdilər. Çünki, indi KTN-də elə şöbə müdirləri var ki, məndən 5-6 yaş böyük olmalarına baxmayaraq, yəni 70-71 yaşlarının olmasına baxmayaraq, bu gün vəzifələrini icra edirlər. Mənim onlardan əskik yerim yoxdur. Əksinə, elmi dərəcələrimə görə, onlardan fərqlənirəm".
Bu sözləri Movqe.az-a Kənd Təsərrüfatı Nazirliyində yaş senzi ilə əlaqədar təqaüdə göndərilən nazirliyin Aqrar islahatlar, kənd ərazilərinin və sahibkarlığın inkişafı şöbəsinin müdiri İslam İbrahimov söyləyib. İ. İbrahimov işdən çıxmasına elə də təəssüflənmədiyini, "görünür belə məsləhət imiş" deməklə elə də narazı olmadığını bildirib: "Mənim aqrar sahədə 42 illik təcrübəm var. 33 il KTN-da çalışmışam. Elmlər doktoru, professoram, eyni zamanda Yazıçılar Birliyinin üzvüyəm. Yazıb pozmağı çoxlarından yaxşı bacarıram. Yəqin ki, yenə də işsiz qalmayacağam, işləyəcəyəm. Hələki, dincəlirəm".
Qeyd edək ki, KTN-da Bitkiçilik məhsullarının istehsalı, emalı və ərzaq ehtiyatlarının dövlət tənzimlənməsi şöbəsinin müdiri Sabir Vəliyev və Heyvandarlıq, Damazlıq işi və Otlaqlar Baş Idarəsinin rəisi Çingiz Fərəcovun 71 yaşı var. Kənd Təsərrüfatı Nazirliyi Aqrar Elm Mərkəzinin baş direktoru Əsəd Musayevin isə bu ilin yanvar ayının 8-də 75 yaşı tamam oldu. KTN-də yaşı 65-i keçən şöbə müdirlərinin siyahısını uzatmaq da olar.