Zidan "Real Madrid"i klub prezidenti ilə fikir ayrılıqları səbəbindən tərk edib

5 İyun 2018 10:13 (UTC+04:00)

Zinəddin Zidan İspaniya "Real Madrid"inin baş məşqçi postunu klub prezidenti Florentino Pereslə fikir ayrılıqları üzündən tərk edib. 

"Report"un "Mirror"a istinadən verdiyi məlumata görə, 45 yaşlı mütəxəssis Peresdən İngiltərənin "Çelsi" komandasının yarımmüdafiəçisi Eden Azarın alınmasını istəyib. Lakin "kral klubu"nun rəhbəri bundan imtina edib. 
Üstəlik, Peres "Mançester Yunayted"in qapıçısı David de Xeanı transfer etmək niyyətində olduğunu söyləyib. Amma Zidan əsas qapıçı Keylor Navasdan razı olduğunu diqqətə çatdırıb. 
Qeyd edək ki, Zinəddin Zidan "Real Madrid"də 2016-cı il yanvarın 4-dən bu il mayın 31-dək çalışıb. Onun rəhbərliyi altında "kral klubu" İspaniya çempionu, İspaniya Super Kubokunun sahibi, 3 dəfə Çempionlar Liqasının qalibi, hərəyə 2 dəfə UEFA Super Kubokunun və klublararası dünya çempionatının qalibi olub. Bu komanda Zidanla ümumilikdə 9 titul əldə edib.