Aprelin 9-da Bakı Biznes Mərkəzində İqtisadi İnkişaf naziri Şahin Mustafayev Bakıda səfərdə olan Avropa Yenidənqurma və İnkişaf Bankının (AYİB) Direktorlar Şurasının üzvləri ilə görüşüb.Görüşdən əvvəl AYİB nümayəndələri Bakı Biznes Mərkəzində Azərbaycanın sosial-iqtisadi uğurları barədə təqdimatla tanış olublar.
Mövqe.az-ın məlumatına görə, görüşdə İqtisadi İnkişaf naziri Şahin Mustafayev AYİB-in Direktorlar Şurasının ölkəmizə ikinci məsləhətləşmə səfərinin bank ilə Azərbaycan arasında uğurlu əməkdaşlığın göstəricisi olduğunu vurğulayıb, Azərbaycanın bu əməkdaşlığa böyük önəm verdiyini və bank tərəfindən dövlət və özəl sektorun inkişafına göstərilən dəstəyin yüksək qiymətləndirildiyini qeyd edib. Bildirilib ki, indiyədək 117 layihə çərçivəsində AYİB tərəfindən Azərbaycana 2,1 mlrd. ABŞ dolları kredit ayrılıb. AYİB-in Azərbaycandakı kredit portfelinin diversifikasiyası üçün geniş potensialın olduğunu diqqətə çatdıran nazir Şahin Mustafayev bu baxımdan kənd təsərrüfatı, sənaye parklarının fəaliyyətinin dəstəklənməsi sahəsində bankın təcrübəsinin əhəmiyyətini vurğulayıb və ölkəmizdə özəl sektorun inkişafına töhfə verən fəal maliyyə institutu kimi AYİB-i özəl müəssisələrin birbaşa maliyyələşdirilməsi və səhm kapitalında iştirak üzrə fəaliyyətini daha da genişləndirməyə dəvət edib.
AYİB-in Direktorlar Şurasında Böyük Britaniya Birləşmiş Krallığından direktor Conatan Okenden Azərbaycanın qazandığı iqtisadi uğurların Bankın diqqət mərkəzində olduğunu, AYİB və Azərbaycan arasında əlaqələrin bundan sonra da uğurla davam edəcəyinə əminliyini vurğulayıb.
Görüşdə İqtisadi İnkişaf naziri Şahin Mustafayev AYİB-in Direktorlar Şurasının üzvlərinin Azərbaycan iqtisadiyyatına və ölkəmizin bankla əməkdaşlığına dair suallarını cavablandırıb.