Mövqe.az-ın Nazirlər Kabinetinin mətbuat xidmətindən aldığı məlumata görə, aprelin 9-da Azərbaycan Respublikasının Baş naziri Artur Rasizadə Dünya İqtisadi Forumunda iştirak etmək üçün Bakıya gəlmiş Litva Respublikasının Baş naziri Alqirdas Butkeviçiusu qəbul edib.
Forumun işini yüksək qiymətləndirən litvalı qonaq bu nüfuzlu beynəlxalq tədbirin dünya və region ölkələrinin iqtisadi inkişafı üçün böyük əhəmiyyət daşıdığını vurğulayıb. Daha sonra Alqirdas Butkeviçius uğurla həyata keçirilən Heydər Əliyev neft strategiyasının qısa vaxt ərzində Azərbaycanı regionun lider dövlətinə çevirdiyini məmnunluqla qeyd edib. Azərbaycanla Litva arasında ikitərəfli əlaqələrin dinamik inkişaf etdiyinə diqqəti yönəldən qonaq ölkələrimiz arasında hərtərəfli əməkdaşlıq üçün geniş potensialın olduğunu söyləyib.
Azərbaycan iqtisadiyyatının uğurlarından söz açaraq, respublikamızın təşəbbüsü ilə həyata keçirilən qlobal nəqliyyat və energetika layihələri barədə qonağa ətraflı məlumat verən Baş nazir Artur Rasizadə, daha sonra ölkəmiz və xalqımız üçün ən ağrılı problem olan Ermənistan-Azərbaycan, Dağlıq Qarabağ münaqişəsinə toxunub. Bu məsələnin daim ölkə rəhbərliyinin diqqət mərkəzində olduğunu qeyd edən Artur Rasi-zadə münaqişənin beynəlxalq hüquq normaları çərçivəsində, sərhədlərin toxunulmazlığı və ölkəmizin ərazi bütövlüyünün təmin edilməsi yolu ilə həllinə alternativ olmadığını vurğulayıb.
Səmimi keçən görüş zamanı tərəfləri maraqlandıran bir sıra digər məsələlər ətrafında da geniş fikir mübadiləsi olub.