Bu gün Quba şəhər bələdiyyəsinin akt zalında "Azad Könüllülər Klubu" İctimai Birliyi tərəfindən Quba rayonu məktəbləri arasında keçirilən "Ən yaxşı divar qəzeti" müsaqibəsinin qaliblərinin mükafatlandırılma mərasimi keçirilib. Tədbiri giriş nitqi ilə açan Gənclər və İdman idarəsinin müdiri Mustafa Nöhbalayev layihənin əhəmiyyətini qeyd edib, gənclərin fəallığından, xüsusən də, onların rayonun ictimai işlərində yaxından iştirakından söz açıb və gəncləri daha da aktiv olmağa səsləyib.
Sonra rayon icra hakimiyyətinin məsul işçiləri Rəxşəndə Bayramova, Aynur Yəhyayeva çıxış edərək layihəni müsbət qiymətləndiriblər və rayonda gənclərin fəaliyyəti üçün yaradılan şəraitdən danışıblar. Məktəblərdə dərc olunan divar qəzetlərinin fəaliyyətindən söz açan R.Bayramova qeyd edib ki, uzun zaman bu sahəyə diqqət ayrılmadığından divar qəzetlərinin fəaliyyətində bir durğunluq müşahidə olunurdu, amma "Elektron divar qəzeti" layihəsi divar qəzetlərinin səviyyəsini yaxşılaşdırmaqla bərabər, yeni elektron qəzetlərin əsasını da qoymuş olacaq.
Sonda "Ən yaxşı divar qəzeti" müsabiqəsində Hacıbaba Əliyev adına şəhər 1 saylı tam orta məktəbin "Gənc işçi" qəzeti birinci, Zəki Kərimov adına I Nügədi 1 saylı kənd tam orta məktəbin "Əkinçi" qəzeti ikinci, Oqtay Məmmədov adına II Nügədi 1 saylı kənd tam orta məktəbinin "Gənc oxucu" qəzeti üçüncü yerə layiq görüldüyü üçün, Ç.Mursəlov adına Vəlvələ kənd tam orta məktəbinin "Çağdaş" və R.Məmmədov adına Alekseyevka kənd tam orta məktəbinin "Uğur" qəzetləri isə müsabiqədə fəal iştiraklarına görə rayon icra hakimiyyəti, gənclər və idman idarəsi tərəfindən diplom və müxtəlif hədiyyələrlə təltif olunublar.
"Azad Könüllülər Klubu" İB-nin sədri Mehman Məmmədovdan aldığımız məlumata əsasən üç mərhələdən ibarət olan "Elektron divar qəzeti" layihəsinin ikinci mərhələsi artıq sona çatıb. Üçüncü mərhələdə iştirakçılara bloq təlimləri keçiriləcək, bununla da bloqların timsalında divar qəzetlərinin elektron versiyası yaradılacaq. Bu məqsədlə "Ən yaxşı divar qəzeti" müsabiqəsini keçirdik ki, şagirdlərdə bu sahəyə maraq oyansın və keçiriləcək bloq təlimlərində fəal iştirak etsinlər.
Xatırladaq ki, "Ən yaxşı divar qəzeti" müsabiqəsinə cari ilin yanvar ayında Quba rayon A. Məmmədov adına 2 saylı təbiət fənləri təmayüllü məktəb-liseyində 3 günlük təlimdən sonra start verilmişdi.