ADAU-nun rektoru Ibrahim Cəfərov Almaniyada səfərdədir

25 İyun 2018 15:32 (UTC+04:00)

Dünyanın 20 ölkəsinin 60-dan artıq universiteti ilə əməkdaşlıq edən Azərbaycan Dövlət Aqrar Universitetinin (ADAU) geniş ikitərəfli əməkdaşlığa malik olduğu ölkələrdən biri də Almaniyadır. Hər il onlarla tələbə, professor-heyəti təhsil almaq, təcrübə keçmək, bilik və bacarıqlarını artırmaq məqsədiilə Almaniya Federativ Respublikasının müvafiq ali təhsil və elmi-tədqiqat müəssisələrinə göndərilir. Ümumilikdə ADAU-nun Almaniyanın aqrar sahə üzrə kadr hazırlığı ilə məşğul olan 10-a yaxın ali təhsil müəssisəsi ilə geniş ikitərəfli əlaqələri mövcuddur.

ADAU nun mətbuat xidmətinin xəbərinə görə təhsil müəssisəsinin rektoru, AMEA-nın müxbir üzvü, professor Ibrahim Cəfərov Almaniyanın Vaynştefan Trizdorf universitetində səfərdədir və bu səfər əlaqələrin daha geniş miqyasda inkişafını sürətləndirəcək. Səfərin əsas məqsədi 20 ildən artıq bir müddətdə mövcud olan əlaqələrin gücləndirilməsi istiqamətində işləri təkmilləşdirmək, bakalavriat və magistr səviyyəsində menecment (alman proqramı) ixtisasının beynəlxalq akreditasiyasını müzakirə etməkdən ibarətdir. 5 günlük rəsmi səfər çərçivəsində k.t.fakültəsinin dekanı, proqram rəhbəri Prof.Dr. Ralf Schlauderer və universitetin rektoru Dr. Eric Veulliet ilə ikili görüşlər təşkil olunub, akreditasiyanın mümkünlüyü istiqamətində, əlaqələrin daha geniş müstəvidə inkişafı sahəsində addımlar atılıb. Səfər ərəfəsində rektor Ibrahim Cəfərov bu universitetdə ERASMUS + proqramı çərçivəsində bakalavriat səviyyəsinin və MBA magistr proqramı çərçivəsində təhsil alan ADAU-nun 15 tələbəsi ilə görüşüb. Görüş zamanı rektor tələbələrin yaşayış və məişət şəraiti ilə maraqlanıb, eyni zamanda təhsilləri ilə bağlı məsələlər müzakirə edilib, mövcud problemləri dinləyən rektor bu problemlərin aradan qaldırılması istiqamətində mümkün köməklik göstərib.

Ibrahim Cəfərov iyun ayının 24-də rektorların görüşündə Özbəkistanın Dashkənd Dövlət Aqrar Universiteti, Andican Kənd Təsərrüfatı İnstitutu, Ukraynanın SUMİ Milli Aqrar Univeristeti və Serbiyanın Nova Pazar Dövlət Universiteti ilə əməkdaşlıq müqavilələri də imzalayıb.

Əlihüseyn Şükürov