Milli Məclisdə miqrasiya qanunvericiliyinə dəyişiklikləri nəzərdə tutan yeni qanunların qəbulu ölkəmizdə səfər edən əcnəbilərin işini rahatlaşdıracaq. Bu barədə Dövlət Miqrasiya Xidmətinin rəisi Vüsal Hüseynov Facebook sosial şəbəkəsindəki hesabında yazıb. Movqe.az-ın məlumatına görə, V. Hüseynov yeni qanunların qəbulunun ölkəmizdə səfər edən əcnəbilərin qeydiyyatı və yaşaması ilə bağlı rahatlığının təmin ediməsi, turizm baxımından cəlb ediciliyin artması və sahibkarlığın inkşafının dəstəklənməsinə töhvə verəcəyini qeyd edib: " Bu gün Milli Məclisdə cənab prezident İlham Əliyev tərəfindən təşəbbüs edilən miqrasiya qanunvericiliyinə dəyişiklikləri nəzərdə tutan yeni qanun layihələri qəbul edilmişdir. Bu Qanunların məqsədi ölkəmizdə səfər edən əcnəbilərin qeydiyyatı və yaşaması ilə bağlı rahatlığının təmin ediməsi, turizm baxımından cəlb ediciliyin artması və sahibkarlığın inkşafının dəstəklənməsidir.1. Ölkəmizə gələn əcnəbilərin (turistlərin) ölkə ərazisində olduğu yer üzrə qeydiyyata düşməsi üçün mövcud 10 gün artırılaraq 15 gün müəyyən edilir.
2. Miqrasiya qanunvericiliyini pozduğuna görə haqqında inzibati cərimə növündə inzibati tənbeh tədbiri tətbiq edilmiş əcnəbilər artıq cəriməni ödəmədiyi təqdirdə ölkə ərazisini barələrində ölkəyə təkrar girişlərinə hər hansı məhdudiyyət tətbiq edilmədən tərk edə biləcəkdir. Bu halda onların ölkəyə girişinə məhdudiyyət cəriməni ödəyəcəkləri müddətədək məhdudlaşdılır və cəriməni ödədikdən sonra isə ölkəyə sərbəst gəlmələri təmin ediləcəkdir. Təbii ki, inzibati qaydada ölkədən kənara çıxarılma halları istisna olmaqla.
3. Miqrasiya Məcəlləsində əcnəbilər tərəfindən son üç ildə iki dəfə miqrasiya qanunvericiliyi əleyhinə olan inzibati xəta törətdildikdə onların ölkəyə girişlərinə 5 il qadağa qoyulmasını nəzərdə tutan müddəa ləğv olunur.
4. Daimi yaşama icazəsinin alınmasına imtina verilmiş əcnəbilərin sadəcə ərizə ilə (digər əlavə sənədləri təqdim etmədən) müvəqqəti yaşamaq icazəsi almaq üçün Dövlət Miqrasiya Xidmətinə müraciət edə biləcəklər.
5. Ölkədə olma, yaşama, yaxud ölkə ərazisindən tranzitlə keçməsi qaydalarının pozulmasına görə inzibati məsuliyyətə cəlb olunmuş əcnəbilərə inzibati məsuliyyətə cəlb olunmalarına səbəb olmuş halın aradan qaldırılması üçün 10 gün vaxt veriləcək.
6. Vizası və ya müvəqqəti olma müddətinin uzadılması barədə qərarı, yaxud müvəqqəti və ya daimi yaşamaq üçün icazəsi ləğv edildikdə barəsində kənara çıxarma haqqında qərar qəbul edilmiş əcnəbilər müvafiq sənədlərin ləğv edilməsinə səbəb olmuş əsaslar aradan qalxdıqda məhdudiyyət müddətinin bitməsini gözləmədən ölkəyə sərbəst gələ biləcəklər".
Zülfiyyə QULUYEVA