İqtisadi İnkişaf Nazirliyi ilə Macarıstan nümayəndə heyəti arasında görüş keçirilib. Nazirlikdən Movqe.az verilən məlumata görə, görüşdə İqtisadi İnkişaf nazirinin müavini Niyazi Səfərov, Azərbaycanın Macarıstandakı səfiri Vilayət Quliyev, Macarıstanın Azərbaycandakı səfiri Jolt Çutora, "WizzAir" aviaşirkətinin direktoru Gyorgi Abran və Macarıstan Ticarət Evinin direktoru Ceyhun Abdullayev iştirak edib. İqtisadi İnkişaf nazirinin müavini Niyazi Səfərov Azərbaycan-Macarıstan ikitərəfli əlaqələrinin uğurla inkişaf etdiyini, ölkələrimiz arasında əməkdaşlığın qarşılıqlı dostluq və hörmət prinsipləri üzərində qurulduğunu vurğulayıb: "Əlaqələrin inkişafında dövlət və hökumət başçılarının qarşılıqlı səfərləri, aparılan danışıqlar mühüm əhəmiyyət kəsb edir. Azərbaycan və Macarıstan iqtisadi əməkdaşlığının genişlənməsində Azərbaycan Respublikası Hökuməti və Macarıstan Respublikası Hökuməti arasında iqtisadi əməkdaşlıq üzrə Birgə Komissiyanın fəaliyyəti də xüsusi əhəmiyyət daşıyır. İnkişaf edən əlaqələrin nəticəsi olaraq, ötən il Bakıda Macarıstan Ticarət Evi açılıb. Azərbaycan Respublikası Hökuməti və Macarıstan Respublikası Hökuməti arasında iqtisadi əməkdaşlıq üzrə Birgə Komissiyanın ötən ilin oktyabrında keçirilmiş 3-cü iclasında Budapeşt-Bakı-Budapeşt birbaşa aviareysinin açılması barədə məsələ müzakirə olunmuş və ilkin razılıq əldə edilib. Artıq müvafiq sənədlər imzalanıb və bu ilin ortalarından etibarən aviareys fəaliyyətə başlayacaq. Yeni aviareys Azərbaycan-Macarıstan uğurlu əməkdaşlığının daha bir göstəricisi olmaqla, iki ölkə arasında iqtisadi-ticarət və mədəni əlaqələrin genişlənməsində, turizmin inkişafında əhəmiyyətli olacaq. Birbaşa hava xəttinin açılması həmçinin, ölkələrimizin biznes dairələrinin işgüzar əlaqələrinin genişlənməsinə, sərnişin və yük dövriyyəsinin artmasına xidmət edəcək".
Daha sonra Macarıstanın Azərbaycandakı səfiri Jolt Çutora iki ölkə arasında əlaqələrin inkişafı üçün böyük potensialın olduğunu vurğulayıb, yeni aviareysin Macarıstan-Azərbaycan əməkdaşlığının daha da genişlənməsində, iqtisadi-ticarət əlaqələrinin inkişafında əhəmiyyətli rol oynayacağını qeyd edib.
Sonda KİV nümayəndələri üçün brifinq keçirilib onları maraqlandıran suallar cavablandırılıb.