Bayağı xarakterə malik mahnılar həmişə cəmiyyətdə böyük narazılıq predmetinə çevrilib. Lakin təəssüflə qeyd etmək lazımdır ki, hazırda belə mahnıların həm ifaçıları, həm "bəstəkarları" çoxalıb. Bu isə musiqi zövqlərini korlamaqda, Azərbaycanın xalq mahnılarının sıradan çıxardılaraq unudulmasına səbəb olmaqda, əsl bəstəkarların zəhmətini yerə vurmaqdadır. Özü də bu məsələdə özəl telekannallar və radiolar da kifayət qədər böyük rol oynayır.
Professional Azərbaycan bəstəkarları, incəsənət xadimlərimiz də zövqləri korlayan mahnıları fəlakət adlandırılar və efirlərdə həmin bayağı mahnıların yığışılmasını vacib sayırlar. Tanınmış Azərbaycan bəstəkarı, incəsənət xadimi Faiq Sücəddinov Mövqe-aza-a açıqlamasında vəziyyət dəyişməyəcəyi təqdirdə bayağı mahnıların get-gedə xalq və əsl bəstəkar mahnılarını sıradan çıxaracağını bildirdi: "Bu gün efirdə verilən mahnılardan əksəriyyəti bayağı mahnılardır. Mən onları çox ürək ağrısı ilə dinləyirəm. Bu gün bəstəkar mahnısı yox dərəcəsindədir və olannlar da səslənmir. Get-gedə bayağı mahnılar özlərinə daha çox yer tutacaqlar, bəstəkar və xalq mahnıları isə yox olacaqlar, tamamilə silinəcəklər. Bizim mahnıları gürcülər,dağıstanlılar, ermənilər oxuyurlar. Biz isə qulaq asırıq. Qabaqlar başqaları oxuyanda bizim mahnılar qiymətə minirdi. Ancaq indi heç o da olmur. Bizim musiqilərimizi oğurlayırlar, müəllifsiz, anonim qeyd edirlər biz isə hələ seyrçi mövqeyindəyik.
Bizim xalq və bəstəkar mahnilarımızın disklərini xarici ölkələrə yollamaq, təbliğ etmək lazımdır. Qoy heç satmasınlar, amma heç olsa hərdən o mahnılar səslənsinlər. Yeni oranjman etsinlər. Nə edirlər etsinlər, təki o, mahnıları səsləndirsinlər. Bir şey səslənməyəndə oğurlayırlar və ya həmin mahnı özü məhv olur". F. Sücəddinov bayağı mahnıların populyarlaşmasında ən çox televiziya kanallarını günahlandırdı: "Əvvəllər bayağı mahnıların yayımlanmasına icazə verilmirdi. İndi isə televiziya kanalları hər bir mahnını efirə buraxır. Heç nəyi də yoxlamırlar, müzakirə etmirlər. Yoxlanmamış musiqinin səslənməsi çox qorxuludur. Bəlkə bir müğənni erməni mahnısı oxuyub, bəlkə söyüş söyür, bəlkə o mahnı heç mahnı deyil. Bu şeylərə indi heç kim fikir vermir".
Xalq şairi Vaqif Səmədoğlu da
günümüzdə bayağı olsa da, dillər əzbəri olan mahnılara münasibət
bildirdi: "Bayağı dediyiniz mahnıların ömrü gödək olur, yaddaşlarda
az qalır. Xalq musiqilərimiz, mahnılarımız isə əbədidir. Həmçinin
onu da qeyd edim ki, yaxşı bəstəkar mahnıları da həmişə yaşayacaq .
bayağı musiqilər heç vaxt o tip mahnılar sıradan çıxara bilməz.
Çünki bayağılıq əsil sənətdən çox-çox zəifdir".
V. Səmədoğlu bayağı mahnıların qarşısının alınmasının mümkünsüz olduğunu da qeyd etdi: " Bu cür bayağı mahnıların qarşısını almaq bu gün həqiqətən də mümkünsüzdür. Bütün dövrlərdə bu kateqoriyalı mahnılar olub, amma yaddaşlarda qalmayıb, silinib gedib".