Məktəblərin yaxınlığında siqaret satılmasına görə deklarativ cərimələr artırılmalıdır

17 Aprel 2013 16:03 (UTC+04:00)
"Azərbaycanda siqaret çəkənlərin yaş həddinin aşağı düşməsinin səbəbi orta məktəblərə yaxın ərazilərdə siqaretin satılması ilə bağlı tətbiq olunan deklarativ cərimələrin artırılmamasıdır. Bu problemi aradan qaldırmaq üçün ümumtəhsil müəssisələrinin yaxınlığında siqaret satılması hallarının qarşısı alınmalıdır".
Bu sözləri Movqe.az-a 13-14 yaşlı məktəblilər arasında siqaret çəkənlərin sayının artması ilə bağlı məlumata münasibətində Milli Məclisin Sosial Siyasət Komitəsinin sədr müavini Musa Quliyev söyləyib. M. Quliyev bildirib ki,  2001-ci ildə "Tütün və Tütün Məmulatları Haqqında" qəbul olunan qanunda məktəblərə yaxın ərazilərdə siqaret satışının yasaq olduğu göstərilib. Amma qarşısının alınması qaydaları və sair hələki hazırlanmayıb.  Bu səbəbdən də bu qaydalar hazırlanmalı, cərimələrin məbləği artırılmalıdır ki, məktəblilər arasında siqaret çəkənlərin sayı azalsın. Eyni zamanda "İctimai yerlərdə siqaret çəkməni məhdudlaşdıran qanun"un qəbul olunmasına da ciddi ehtiyac var.
Qeyd edək ki, Səhiyyə Nazirliyinin İctimai Səhiyyə və İslahatlar Mərkəzinin direktoru Ceyhun Məmmədov bildirib ki, 13-14 yaşlı məktəblilər arasında siqaret çəkənlərin sayının artması ilə bağlı bu nəticələr Ümumdünya Səhiyyə Təşkilatının (ÜST) dəstəyi ilə məktəblərdə aparılan araşdırma nəticəsində məlum olub. Onun sözlərinə görə, 2005-ci ildə ÜST Tütünlə Mübarizə üzrə Çərçivə Konvensiyasını qəbul edib. Azərbaycanda tütünlə mübarizə istiqamətində görülən işlər mövcud konvensiyaya uyğun həyata keçirilir.