Rəşad Həsənov: "Nağdsız ödənişlərin stimullaşdırılması üçün vergi ödənişlərinin 2-3 dəfə azaldılması, mümkündür"
Artıq xeyli müddətdir ki, iqtisadi gündəmin əsas mövzularından biri də ölkədə nağdsız ödənişlərin həcminin genişləndirilməsi ilə bağlıdır. Məsləyə münasibət bildirən iqtisadi məsələlər üzrə dövlət müşaviri Vahid Axundov qeyd edib ki, Azərbaycanda nağdsız ödənişlərin stimullaşdırılması üçün belə ödənişlər üzrə vergi dərəcələri kəskin - 2-3 dəfə azaldılmalıdır.
Vergilər Nazirliyinin mətbuat katibi Şahin Məmmədov isə Mövqe.az-a açıqlamasında nağdsız ödənişlərin stimullaşdırılması üçün vergi ödənişlərinin azaldılması ilə bağlı təklif planının hazır olduğunu açıqladı: "Bununla bağlı təkliflər hazırlanıb və hökümətə təqdim edilib. Detallar barədə hələ ki, ictimaiyyətə məlumat verə bilmirik. Həmin təklifdə vergilərin nə qədər azaldılmasını da açıqlaya bilmərik. Lakin qeyd edim ki, həmin təklif planında stimullaşdırıcı, məhdudlaşdırıcı və nəzarət tədbirləri qeyd olunub. Daha çox yeri isə stimullaşdırıcı tədbirlər alıb. Nağdsız ödənişlərin stimullaşdırılması üçün vergi ödənişlərin azaldılması məsələsinə həm hökümət, həm də cənab Prezident baxacaq və ondan sonra qərar qəbul olunacaq. Ölkə rəhbərliyinin tapşırığı ondan ibarətdir ki, bu sahə maksimum inkişaf etdirilsin, nağdsız ödənişlərin sayı artırılsın. Bununla bağlı təklifləri hazırlayıb vermişik, hal-hazırda hökümətdə baxılır".
Deputat Əli Məsimli də məsələyə münasibət bildirdi: "Bütün dünyada nağdsız ödənişlər tətbiq olunur. Onun xüsusi çəkisinin artırılması üçün dövlət müvafiq tədbirlər görməlidir. Ancaq 2-3 dəfə azaldılma çox böyük bir rəqəm edir".
İqtisadi və Sosial İnkişaf Mərkəzinin eksperti Rəşad Həsənov isə nağdsız ödənişlərin stimullaşdırılması üçün vergi ödənişlərinin 2-3 dəfə azaldılmasının mümkün olduğunu qeyd etdi: "Bir müddət öncə biz bununla bağlı təkliflər planı hazırlayıb, Vergilər Nazirliyinə təqdim etmişdik. Həmin planda dövriyyənin hökümətə 2 bələdiyyəçi formada göstərilməsi qeyd olunurdu : 1. Nağdsız dövriyyələr və 2. Nağd dövriyyələr. Təklif olunudu ki, nağd dövriyyə əvvəlki qaydada vergiyə cəlb olunsun, nəğdsiz dövriyyələrə isə 50% güzəşt edilsin. Nağdsız ödənişlərin stimullaşdırılması üçün vergi ödənişlərinin 2-3 dəfə azaldılması əlbəttə ki, mümkündür.
Əgər nağdsız ödənişlər stimullaşdırılsa, bu zaman avtomatik olaraq qeydiyyata düşəcək. Çünki pos-terminallarla ödənən ödənişlərin hamısı avtomatik olaraq qeydiyyata düşdüyünə görə, vergiyə də birbaşa cəlb olunur".
İqtisadçı ekspert nağdsız ödənişlərin stimullaşdırılması üçün vergi ödənişlərinin azaldılmasının heç bir ziyanı olmadığını, əksinə, müsbət məqamlara yol açacağını bildirir: "Vergi qanunvericiliyində dəyişiklik olmalıdır ki, bu məsələ leqallaşdırılsın. Nağdsız ödənişlərin stimullaşdırılması üçün vergi ödənişlərinin azaldılmasının heç bir ziyanlı tərəfi yoxdur. Fikrimcə, bu sahədə tezliklə addımlar atılacaq və nağdsız ödənişlərin stimullaşdırılması üçün müəyyən dərəcədə də olsa vergilərin azalması olacaqdır".