Peyvənd xofuna aydınlıq gətirildi-Eksklüziv

23 Aprel 2013 19:05 (UTC+04:00)
"Azərbaycanda valideynlərin peyvəndlə bağlı narahatçılığının olması ilə barədə məlumatlar bizi də narahat edir".
Bu sözləri Ümümdünya Səhiyyə Təşkilatının (ÜST)Avropa Regional Bürosunun Vaksinlə qarşısı alınan xəstəliklər və İmmunlaşdırma üzrə texniki proqramın eksperti Lyudmila Mosina Movqe.az-ın Azərbaycana idxal edilən peyvəndlərin təhlükəsizliyi ilə bağlı sualını  cavablandırarkən söyləyib. Avropa İmmunlaşdırma Həftəsi çərçivəsində keçirilən konfransda iştirak edən xanım Mosina Movqe.az-a bildirib ki, əgər Azərbaycana idxal edilən bütün peyvəndlər Ümümdünya Səhiyyə Təşkilatı (ÜST) tərəfindən prekvalifikasiyadan keçirilibsə deməli həmin peyvəndlərin keyfiyyətindən şübhələnmək yersizdir: "Mən bilmirəm ki, sizin ölkənizin aldığı bütün peyvəndlər ÜST-ün prekvalifikasiyasından keçib, yoxsa yox. Amma onu qeyd etmək istəyirəm ki, qaydalara görə, peyvənd istehsalçısı özü ÜST-ə istehsal etdiyi peyvəndlərin  prekvalifikasiyası ilə bağlı müraciət edir. Bundan sonra ÜST-ün ekspertləri həmin zavodun istehsal etdiyi peyvənlərin tərkibini laborotor analiz edərək prekvalifikasiyası ilə bağlı qərar verir. Əgər peyvənd  standartlara uyğun hazırlanıbsa, təhlükəsizdirsə ÜST həmin peyvəndlə bağlı prekvalifikasiya qərarı verir. Və bu məlumat ÜST-ün saytında yerləşdirilir".
L. Mosina Movqe.az-ın Hindistan istehsalı olan peyvəndlərin keyfiyyətsizliyi ilə bağlı Azərbaycanda yayılmış məlumatlarla bağlı sualını da cavablandırıb. Bildirib ki, Hindistandakı peyvənd istehsal edən müəssisələrin hamısının istehsal etdiyi məhsulu keyfiyyətsiz adlandırmaq olmaz. Çünki, Hindistandakı peyvənd istehsal edən müəssisələrinin bəzilərinin peyvəndlərinə ÜST tərəfindən  prekvalifikasiya qərarı verilib: "Əgər sizin ölkənizə Hindistandakı zavodların istehsalı olan peyvəndlər alınıb gətirilirsə bu o demək deyil ki, həmin peyvəndlər təhlükəlidir. Əgər ÜST tərəfindən həmin şirkətin peyvəndi prekvalifikasiyadan keçibsə deməli narahatçılığa heç bir əsas yoxdur. Sadəcə hansısa valideynin narahatçılığı varsa öyrənə bilər ki, həmin Hindistanın istehsalı olan peyvəndə ÜST tərəfindən prekvalifikasiya qərarı verilib, yoxsa yox. Əgər bu qərar verilibsə deməli narahat olmağa dəyməz".
Movqe.az Azərbaycana gətirilən peyvəndlərin ÜST tərəfindən prekvalifikasiyadan keçib-keçmədiyini də araşdırıb. Bu barədə Movqe.az-ın sorğusunu cavablandıran Səhiyyə Nazirliyinin İnnovasiya və Təhcizat Mərkəzindən bildirilib ki, Azərbaycana peyvəndlərin alınması ilə bağlı tender keçirilərkən tenderdə iştirak edən şirkətlər qarşısında  ÜST tərəfindən prekvalifikasiyadan keçən peyvəndlərin alınması şərt kimi qoyulur: "Tender şərtlərində qeyd edirik ki, peyvəndlərin alınmasını həyata keçirəcək şirkət mütləq ÜST tərəfindən prekvalifikasiya qərarı verilmiş peyvəndləri alaraq ölkəyə gətirməlidir. Azərbaycana gətirilən peyvəndlərin tərkibi ilə bağlı şübhəsi olanlar, keçirilən tenderlərdə ÜST tərəfindən prekvalifikasiya qərarı verilmiş peyvəndləri almaq barədə öhdəlik götürmüş şirkətin tenderin qalibi olduğunu araşdırıb öyrənə bilər. Qeyd edək ki, Azərbaycana alınaraq gətirilən peyvəndlər ölkəmizdə də Dərman Vasitələrinin Analitik Ekspertiza Mərkəzində labarotor yoxlamadan keçirilir. Bundan sonra istifadəyə buraxmaq üçün İnnovasiya və Təhçizat Mərkəzinə təhvil verir. Azərbaycana gətirilən peyvəndlər arasında Hindistan istehsalı olan peyvəndlər var. Amma o şirkətlərin istehsal etdiyi peyvəndlərin ÜST tərəfindən prekvalifikasiyadan keçdiyi barədə sənədi də var".
Qeyd edək ki, Azərbaycana peyvəndlər Rostropoviç-Vişnevskaya Fondu vasitəsi ilə də gətirilir. Amma Fondun Azərbaycandakı nümayəndəlinin rəhbəri Soltan Məmmədov da deyir ki, ölkəmizə Rostropoviç-Vişnevskaya Fondu vasitəsi ilə gətirilən bütün peyvəndlər ÜST tərəfindən prekvalifikasiyadan keçmiş peyvəndlərdir.