Mövqe.az-ın məlumatına görə, aprelin 24-də Naxçıvanda Beynəlxalq Telekommunikasiya İttifaqının (BTİ) "Beynəlxalq standartlara uyğun telekommunikasiya/İKT indikatorlarının unifikasiyası" mövzusunda seminarı və Regional Rabitə Birliyinin (RRB) rabitə iqtisadiyyatı komissiyası üzrə 31-ci iclası işinə başlayır.
Aprelin 26-dək davam edəcək BTİ-nin seminarında telekommunikasiya/İKT indikatorlarının unifikasiyasının əsas qruplarının, onların müəyyənləşdirilməsi və metodologiya məsələlərinin, İKT-nin beynəlxalq səviyyədə inkişafı üzrə məlumatların yayılması və vahid şəklə salınması problemlərinin, eləcə də İKT sahəsində mövcud statistik məlumatların milli koordinasiyasının müzakirəsi nəzərdə tutulur.
RRB komissiyasının iclasında beynəlxalq zənglərin başa çatdırılmasına operatorlararası tariflərin unifikasiyası üzrə işlər, stasionar və mobil şəbəkələrdə zənglərin LRIC modeli əsasında qiymətinin hesablanması müzakirə ediləcək. İclas iştirakçıları BTİ-nin Telekommunikasiyanın Standartlaşdırılması üzrə Ümumdünya Assambleyası - 2012 və Beynəlxalq Telekommunikasiya üzrə Ümumdünya Konfransı - 2012 tədbirlərinin yekunlarını, eləcə də Azərbaycanda İKT sektorunun və informasiya cəmiyyətinin inkişafının iqtisadi aspektlərini və digər məsələləri nəzərdə keçirəcəklər.