Azərbaycanda 1941-1945-ci illər Böyük Vətən müharibəsi iştirakçılarına, həlak olmuş və ya sonralar vəfat etmiş döyüşçülərin dul arvadlarına, arxa cəbhədə fədakar əməyinə görə orden və medallarla təltif edilmiş şəxslər birdəfəlik yardımı artıq gələn həftənin ortalarından etibarən ala bilər.
"APA-Economics"in məlumatına görə, bunu Dövlət Sosial Müdafiə Fondunun (DSMF) sədri Səlim Müslimov bildirib.
Onun sözlərinə görə, əgər Maliyyə Nazirliyi bu həftə ərzində vəsaiti DSMF-nin balansına köçürərsə, artıq gələn həftənin əvvəli Fond öz növbəsində vəsaiti yardım alanların hesablarına köçürəcək və sözügedən yardımı alanlar gələn həftənin çərşənbə günündən etibarən vəsaitlərini ala bilər: "Vəsait bu həftə ərzində DSMF-nin hesabına köçürülməsə, 1941-1945-ci illər Böyük Vətən müharibəsi iştirakçılarına, həlak olmuş və ya sonralar vəfat etmiş döyüşçülərin dul arvadlarına, arxa cəbhədə fədakar əməyinə görə orden və medallarla təltif edilmiş şəxslər birdəfəlik yardımı istənilən halda mayın 9-dək ala biləcəklər".
S.Müslimov onu da bildirib ki, 1941-1945-ci illər Böyük Vətən müharibəsi iştirakçılarının sayı 2,3 min nəfər, Böyük Vətən müharibəsində həlak olmuş və ya sonralar vəfat etmiş döyüşçülərin dul arvadlarına, həmin dövrdə arxa cəbhədə fədakar əməyinə görə orden və medallarla təltif edilmiş şəxslər, İkinci Dünya müharibəsi illərində döyüşən cəbhələrin arxa hüdudları, yaxud döyüşən donanmaların əməliyyat zonaları daxilində ordunun və donanmanın mənafeyi üçün tapşırıqları yerinə yetirmiş xüsusi birləşmələrin işçiləri, Böyük Vətən müharibəsi dövründə Leninqrad şəhərinin müdafiəsinə görə müvafiq medal və döş nişanı ilə təltif edilmiş şəxslər, habelə Leninqrad şəhərinin mühasirəsinin iştirakçılarının sayı isə təxminən 23,5 min nəfər təşkil edir.
Qeyd edək ki, ötən gün Azərbaycan prezidenti İlham Əliyev 1941-1945-ci illər Böyük Vətən müharibəsi iştirakçılarına, həlak olmuş və ya sonralar vəfat etmiş döyüşçülərin dul arvadlarına, arxa cəbhədə fədakar əməyinə görə orden və medallarla təltif edilmiş şəxslərə birdəfəlik maddi yardım verilməsi barədə sərəncam imzalayıb. Sərəncama əsasən, birinci kateqoriyaya aid olan şəxslər, yəni Böyük Vətən müharibəsi iştirakçıları 700 manat məbləğində, ikinci kateqoriyaya aid olanlar isə 300 manat məbləğində birdəfəlik maddi yardım alacaq. Sərəncamın icrası məqsədi ilə 2013-cü il dövlət büdcəsində nəzərdə tutulmuş Prezidentin Ehtiyat Fondundan 9 mln. manat məbləğində vəsait ayrılıb və Maliyyə Nazirliyinə həmin vəsaitin DSMF-nin xüsusi hesabına köçürülməsini təmin edilməsi tapşırılıb.