"Heç bir qadın iş yerim fahişəxanadır deyə o məkanlara getməyəcək"

24 Aprel 2013 16:03 (UTC+04:00)
"Azərbaycanda fahişəlik leqallaşdırılsa da, bu ölkədə "Qırmızı fanar"  adlı bir məkanın fəaliyyət göstərməsi mümkünsüzdür. Çünki, heç bir qadın iş yerim fahişəxanadır deyə o fahişəxanalara getməyəcək".
Bu sözləri Movqe.az-a açıqlamasında "Təmiz Dünya" İctimai Birliyinin sədri Mehriban Zeynalova söyləyib. M. Zeynalovanın sözlərinə görə, Azərbaycanda fahişəliyi özlərinə peşə seçənlər belə bu fəaliyyətlə məşğul oduqlarını mümkün qədər gizlətməyə çalışırlar: "Belə halda fahişəliyin Azərbaycanda leqallaşdırılması ailədaxili zorakılıq hallarını daha çoxaldacaq. Əgər indi həyat yoldaşını qısqanan, ana-bacısında sadəcə şübhələnənlər namus üstə soyuq silaha əl atırlarsa, yaxınının fahişə olduğunu dəqiq bilən kişilər daha ağır cinayətlər törədə bilərlər. Ümumiyyətlə fahişəliyin leqallaşdırılması heç bu işlə məşğul olan qadınların hüququnun qorunması baxımından da əhəmiyyət kəsb etmir. Tutaq ki, fahişəlik leqallaşdı fahişəxanalar sərbəst fəaliyyət göstərə bildi. Yenə də fahişəxanaya gedən kişidən sağlamlığı ilə bağlı arayış tələb olunmayacaq".
Odur ki, bu fahişəliyin əksinə, uşaq seks sənayesinin çiçəklənməsinə gətirib çaxardacaq. Seks biznesi elə biznes sahələrindəndir ki, burada yüksək gəlir əldə etmək mümkündür. Odur ki, çox pul qazanmaq üçün bu sahənin başında duranlar müxtəlif ekzotikalar naminə uşaqları da istismar edəcəklər. Odur ki, fahişəliyi leqallaşdırmağı təklif edənlər, qadınların biznes sahəsinə cəlb edilməsi, biznesini qurmaq istəyən qadınlara  güzəştli şərtlərlə kreditlərin verilməsi üçün  təkliflərlərlə çıxış etsələr daha yaxşı olar". 
Xatırladaq ki, bu günlərdə Milli Məclisdə keçirilən iclasında ölkədə fahişəliyin leqallaşdırılması məsələsi müzakirə olunub. "İnsan alverinə qarşı mübarizə haqqında" qanuna dəyişikliklərin müzakirəsi zamanı Yeni Azərbaycan Partiyasından (YAP) olan deputat Siyavuş Novruzov bildirib ki, milli-mənəvi dəyərləri nəzərə alsaq, bu məsələyə bir az fərqli baxmaq lazımdır: "İndi insan alveri ilə bağlı qanunları sərtləşdiririk, amma problemlər bir az da ağırlaşacaq. Çünki bu işlə qeyri-rəsmi məşğul olanlar yenə də məşğul olacaqlar. Əslində qanunların sərtləşməsi korrupsiyaya yol açacaq. Bu gün Ukraynadan, Filippindən Azərbaycana belə qadınlar axışır. Ötən əsrin əvvəllərində Türkiyədə də belə bir dövr yaşanırdı. Ataturk də bununla bağlı çıxış etmişdi. Çünki Fransadan, başqa Avropa ölkələrdən qadınlar gəlir, 1 il sonra varlanıb gedirdilər. Ona görə də Atatürk bu məsələyə diqqət çəkmişdi. Qanunları sərtləşdirməklə bu məsələnin qarşısını almaq mümkün olmayacaq. İnsan alverinin qarşısını ABŞ və Avropada da ala bilmirdilər. Digər tərəfdən, polis gələndə iki tərəf də qarşılıqlı razılaşma əsasında bir yerdə olduğunu söyləyirlər. Gəlin bu sahədə beynəlxalq təcrübədən istifadə edək. İndi hamı milli-mənəvi dəyərlərin daşıyıcısı, mömin olduğunu söyləməyə başlayacaq".