"Nə qədər ki, torpaq, ərazi işğalı var, ermənilər tərəfindən əqli mülkiyyət işğalı da həyata keçirilir". Mövqe.az-ın məlumatına görə, bunu Azərbaycan Ağsaqqallar Şurasının sədri, millət vəkili Fəttah Heydərov jurnalistlərə açıqlamasında deyib.
F.Heydərov əqli mülkiyyətin mühafizə edilməsinin ümumbəşəri məsələlərdən biri olduğunu bildirərək, Azərbaycanda da əqli mülkiyyətin qorunması sahəsində xeyli işlər görüldüyünü vurğulayıb: "Tarixən yaradılmış əqli mülkiyyət məhsulları bu gün də insanların köməyinə gəlir. Bu gün də insanlar ədəbi, texniki yaradıcılıq sahəsində həmin əqli mülkiyyətdən istifadə edirlər. Xüsusilə də ümumdünya kəşfləri hər kəsin öz adı ilə yaşayır ki, bunların da qorunması ümumbəşəri məsələlərdən biridir. Müəlliflərin hüquqlarını qoruyub saxlamaq və onların əldə etdiyi nailiyyətləri məhz həmin şəxslərin ünvanında əbədi olaraq saxlamaq üçün Müəllif Hüquqları agentliklərinin əməyinə böyük ehtiyac var. Azərbaycanın Müəllif Hüquqları Agentliyi bu sahədə çox işlər görüb. Xüsusilə də son zamanlar görülən işləri yüksək dəyərləndirirəm. Çünki hazırda informasiya sahəsində böyük qloballaşma gedir. Belə bir şəraitdə isə yaradıcı insanların hüquqlarının qorunması böyük əhəmiyyət kəsb edir. Bu beynəlxalq aləmdə də öz əhəmiyyətini itirməyən bir problemdir".
Millət vəkili qeyd edib ki, ermənilər işğal etdiyi Azərbaycan torpaqlarında yaşayan yaradıcı insanların kəşflərini öz adlarına çıxarmaq istəyirlər. Bunun bağışlanmaz hal olduğunu deyən F.Heydərovun sözlərinə görə, işğal davam etdiyi müddətdə əqli mülkiyyət də ermənilər tərəfindən təcavüzə məruz qalır: "Bildiyimiz kimi, torpaqlarımızın 1/5 hissəsi namərd qonşularımız tərəfindən işğal olunub və bu gün də işğalçılar həmin torpaqlardan çıxmırlar. Onlar nəinki torpaqları işğal ediblər, o torpağın üzərində yaradılan bütün əqli mülkləri də özününküləşdirmək, öz ünvanlarına yazmaq təşəbbüsü göstərirlər. Həmin ərazidə yaşayıb-yaradan, elm, mədəniyyət, ədəbiyyat sahəsində ümumbəşəri sözlər deyə bilən insanların müsbət kəşflərini öz adlarına çıxarmaq istəyirlər. Bu doğrudan da bağışlanmaz bir haldır. Nə qədər ki, torpaq, ərazi işğalı var, ermənilər tərəfindən əqli mülkiyyət işğalı da həyata keçirilir".