"Azərbaycan Respublikasının yanacaq-enerji kompleksinin inkişafı (2005-2015-ci illər) üzrə Dövlət Proqramı"na və "Azərbaycan Respublikasının regionlarının 2009-2013-cü illərdə sosial-iqtisadi inkişafı Dövlət Proqramı"na uyğun olaraq ARDNŞ-nin "Azəriqaz" İstehsalat Birliyi tərəfindən ölkənin hər yerində genişmiqyaslı tikinti-quraşdırma və təmir-bərpa işləri həyata keçirilir, "mavi yanacaq"la təchiz olunmayan yaşayış massivlərinin qazlaşdırılması üçün intensiv işlər görülür.
Bu baxımdan Şəki-Zaqatala iqtisadi rayonunda aparılan işlər təqdirəlayiqdir.
Balakən şəhərində yeni yaşayış massivinin, rayonun Talalar, Sarıbulaq, Tülü, Qullar, Qəysə, Xalatala, Qazma, Meşəşambul, Mazımqaray, Roçəhməd, Salban, Şərif, Gərəkli, Arılıqbinə, Püstə Tala, Hənifə, Qazbinə və Poçtbinə kəndlərinin qazlaşdırılması məqsədi ilə ümumilikdə 266,4 kilometr uzunluğunda, Qax rayonunun Şotavar, Almalı, Kötüklü, Calayer, Qıbçaq və Ağçay kəndlərinin qazlaşdırılması üçün isə 29,7 kilometr boru xətləri çəkilib.
Qəbələ şəhərində aparılan təmir işləri, rayonun yaşayış məntəqələrinin qaz təchizatının yaxşılaşdırılması ilə əlaqədar görülən tədbirlər çərçivəsində Bum, Vəndam və Nohurqışlaq qəsəbələri qazlaşdırılıb, ümumilikdə 63,3 kilometr uzunluğunda boru xətləri quraşdırılıb.
Zaqatala rayоnunun Mosul, Yengiyan, Danaçı, Car, Mazıx, Makov, Aşağı Cardaxlı və Yuxarı Tala kəndlərinin qazlaşdırılması məqsədi ilə 94,7 kilometr uzunluğunda, Oğuz rayonunun Padar kəndinin qazlaşdırılması məqsədi ilə isə 31,2 kilometr qaz kəmərləri çəkilib.
Şəki şəhərində fərdi həyətlərdən keçən qaz kəmərləri və qaz sayğaclarının küçəyə çıxarılması işləri başa çatıb. Rayonun Olimpiya məhəlləsi, Novruz və Sarabski küçələrinin, Cəyirli, Sarıca kəndlərinin və Turan qəsəbəsinin, 124-cü kvartalın, Kiş kəndində tikintisi nəzərdə tutulan ''Marxal'' istirahət və qonaq evi kompleksinin qazlaşdırılması, Şəki Qazpaylayıcı Stansiyasından Şəki şəhərinə gələn orta təzyiqli qaz kəmərinin yenidən qurulması işləri çərçivəsində 17,8 kilometr uzunluğunda müxtəlif diametrli boru xətləri quraşdırılıb.