İranda səfərdə olan Azərbaycan Prezident Administrasiyasının rəhbəri Ramiz Mehdiyev bu ölkənin Ali Milli Təhlükəsizlik Şurasının katibi Səid Cəlili və parlament rəhbəri Əli Laricani ilə görüşüb.
ANS-in İrandakı xüsusi müxbirinin verdiyi xəbərə görə, görüşdə iki ölkə arasında əlaqələr, regional və beynəlxalq münasibətlərin genişləndirilməsi kimi məsələlər müzakirə edilib.
Görüşdə çıxış edən Səid Cəlili Azərbaycanla İran arasında müştərək tarixin olmasına işarə edərək bu əlaqələrin daha da genişlənməli olduğunu vurğulayıb.
Prezident Administrasiyası rəhbərinin bu gün axşam Azərbaycanın İrandakı səfirliyində görüş keçirəcəyi gözlənilir.
R. Mehdiyevin İrana səfərinə İran mətbuatı da geniş yer ayırıb. Tehranın məşhur "Həmşəri" qəzeti bu səfərlə bağlı məqaləni manşetə çıxarıb. Məqalədə bildirilir ki, Azərbaycanla yanaşı Misir və Türkiyə nümayəndə heyətləri də İranda səfərdədir.