Samsung şirkəti Android əməliyyat sisteminin idarəetməsi ilə işləyən 7 düym ekranlı üçüncü nəsil Galaxy Tab planşet kompüterini nümayiş etdirib. Qurğu Galaxy Tab 2 ilə müqayisədə daha kompakt korpusu və az çəkisi ilə seçilir.
RİA Novosti-nin məlumatına görə, yeni Galaxy Tab 1 giqahersli Galaxy Tab 2 modeli ilə müqayisədə 1,2 giqahers takt tezlikli ikinüvəli prosessorla təchiz edilib. Ekranın təsvir ölçüsü əvvəlki kimi – 1024x600 meqapiksel olaraq qalsa da, videonu Full HD formatında göstərə bilir. 4000 milliamper/saatlıq tutuma malik akkumulyator da əvvəlki modeldə olduğu kimi qalıb. Qarşı kamera 1,3 meqapikselədək artırılsa da, əsas kamera - 3 meqapiksel qalmaqla dəyişməyib. İstifadəçilər Galaxy Tab 3-ü 64 giqabaytadək genişləndirmə imkanı ilə 8 və ya 16 giqabaytlıq quraşdırılmış yaddaşla əldə edə biləcəklər.
Həmçinin planşet əvvəlki modelə nisbətdə daha nazik və yüngül olub. Təxmini qabariti 111x188x10 olan Galaxy Tab 3 əvvəlki modeldən eninə görə 13 millimetr, uzunluğuna görə 6 millimetr, qalınlığına görə 0,6 millimetr azdır. Əvvəlki qurğunun çəkisi 345 qram idisə, Galaxy Tab 3-ün çəkisi 3G modulun olmasından asılı olaraq 302-306 qram təşkil edir. Yeni planşetin Android 4.1 Jelly Bean platforması əsasında işləməsi isə daha çox diqqəti cəlb edir.
Galaxy Tab 3-ün Wi-Fi modullu versiyası bazara bu ilin mayında, 3G şəbəkələrdə işi dəstəkləyən modifikasiya iyunda çıxarılacaq. Qurğuların qiyməti barədə hələlik məlumat verilmir.