"Bakı Tikiş Evi" yeni təhsil nazirinin qadağasından danışdı
13 May 2013 16:15 (UTC+04:00)
"Yeni təhsil naziri "Bakı Tikiş Evi"nə (BTE) məktəbli formasını
tikməmək üçün hər hansı qadağa qoymayıb. Nə də ki, məktəbli forması
dəyişdirilməyib. Əgər məktəbli forması dəyişdirilsəydi, mütləq bizə
bu barədə xəbərdarlıq olunardı".
Bu sözləri Movqe.az-a təhsil naziri Mikayıl Cabbarovun məktəbli
formasını dəyişdirməsi və yeni tikiş müəssisəsinə həvalə etməsi ilə
bağlı yayılan münasibətlərə cavab olaraq BTE-nin rəhbərliyindən
bildiriblər: "Artıq biz yeni dərs ili üçün 60 min məktəbli forması
tikmişik. 200 min formanın tikilməsi üçün isə parça gətirmişik.
İyun ayından etibarən bütün satış mərkəzlərində olacaq. Yeni təyin
edilən təhsil naziri Mikayıl Cabbarov hələki məktəbli formasının
dəyişdirilməsi ilə bağlı əmr verməyib. Odur ki, biz əvvəlki eskizlə
formanı hazırlayırıq. Əgər forma dəyişdirilsəydi, yəqin ki, xəbər
edərdilər. Biz də ziyana düşüb bu dərs ili üçün formaları istehsal
etməzdik".
Təhsil Nazirliyindən isə sualımıza operativ cavab ala
bilmədiyimizdən Bakı Şəhəri üzrə Təhsil İdarəsi ilə əlaqə saxladıq.
İdarənin ictimaiyyətlə əlaqələr şöbəsinin müdiri Zəminə Əliqızı da
hələki onlarda məktəbli formasının dəyişdirilməsi ilə bağlı
məlumatın olmadığını söylədi.