Abituriyentlərin ərizələrinin qəbulu və təsdiqi başa çatıb
18 May 2013 11:05 (UTC+04:00)
Azərbaycanda 2013/2014-cü tədris ili üçün ali təhsil müəssisələrinə
və tam orta təhsil bazasında orta ixtisas təhsili müəssisələrinə
qəbul imtahanlarında iştirak edəcək abituriyentlərin ərizələrinin
qəbulu və təsdiqi başa çatıb. Mövqe.az-ın
xəbərinə görə, ali məktəblərə sənə qəbulu aprelin 9-dan, ərizələrin
təsdiqi isə aprelin 15-dən başlanıb. Abituriyentlərin ərizələrinin
təsdiqi üçün yaradılan Sənəd Qəbulu Komissiyalarının (SQK)
fəaliyyəti bu gün saat 17:00-da başa çatıb.
Bu il qəbul qaydalarına edilən dəyişiklərə əsasən, ümumi təhsil
müəssisələrini 2012/2013-cü tədris ilində bitirən abituriyentlər,
ilk-peşə ixtisas təhsili müəssisələrini 2012/2013-cü tədris ilində
bitirən qız abituriyentlər və 2011/2012-ci və 2012/2013-cü tədris
illəri üçün Azərbaycanın ali təhsil müəssisələrinin bakalavriat
səviyyəsinə və tam orta təhsil bazasında orta ixtisas təhsili
müəssisələrinə qəbul imtahanlarında iştirak etmək üçün ərizə verib
təsdiq etdirmiş qız abituriyentlər elektron ərizələrini aprelin
9-dan mayın 17-dək SQK-na müraciət etmədən elektron ərizə
səhifəsinə daxil olub özləri təsdiq edirlər. Onların ərizələrinin
qəbulu və təsdiqi prosesi isə gecə saat 12-də bitib.
Qeyd edək ki, 2013/2014-cü tədris ili üçün ali məktəblərə I ixtisas
qrupu üzrə qəbul imtahanı iyulun 21-də, II ixtisas qrupu üzrə qəbul
imtahanı avqustun 3-də, III ixtisas qrupu üzrə qəbul imtahanı
iyulun 14-də, IV ixtisas qrupu üzrə qəbul imtahanı isə iyulun 28-də
keçiriləcək. Ali təhsil müəssisələrinə ixtisas seçimi 6-15
avqustda, bakalavriat səviyyəsi üzrə ali təhsil müəssisələrinə
əlavə yerləşdirmə və orta ixtisas təhsili müəssisələrinin (tam orta
təhsil bazasında) müsabiqəsi və yerləşdirilməsi 18-22 avqustda
aparılacaq.