Budapeştdə “Böyük İpək Yolu”nun gəncləri gələcək fəaliyyəti müzakirə ediblər
20 May 2013 12:01 (UTC+04:00)
Macarıstanın paytaxtı Budapeştdə "Böyük İpək Yolu" Beynəlxalq
Gənclər İttifaqının Üzvlər Şurasının növbəti iclası keçirilib.
Mövqe.az-ın məlumatına görə, Gənclər İttifaqından bazar
ertəsi bildirilib ki, 28 ölkədən gəlmiş nümayəndənin iştirak etdiyi
iclasda "Böyük İpək Yolu" BGT-nin sədri, millət vəkili Fuad
Muradov, gənclər və idman nazirinin müavini İntiqam Babayev,
Azərbaycanın Macarıstanda fövqaladə və səlahiyyətli səfiri Vilayət
Quliyev, Macarıstanın İnsan Resursları Nazirliyi Gənclərlə iş üzrə
dövlət katibinin müavini Norbert Kiss və bu ölkənin gənclər
təşkilatının liderləri iştirak ediblər.
Fuad Muradov iclasda deyib ki, təşkilatda bir araya gəlmiş gənclər
coğrafi baxımdan tamam fərqli yerlərdə yaşasalar da, arzuları və
baxışları eynidir:
"Bu dostluq, əməkdaşlıq və dinc dünya arzularıdır. Dini, dili
fərqli olan gənclərin bir yerdə olmaları və əməkdaşlığı təmsil
etdikləri dövlətlərin də bir-biri ilə dostluğu üçün mühüm stimul
verir. Vaxtilə mühüm ticarət və mədəni münasibətlər qovşağı olan bu
tarixi marşrut bu gün də özünün əhəmiyyətini saxlayır və ölkələr
arasında dostluq və qardaşlıq mesajlarını çatdırmaqda vacib işi
yerinə yetirir".
Gənclər və idman nazirinin müavini İntiqam Babayev çıxışında
təşkilatın fəaliyyətini dəstəklədiklərini bildirib. Onun sözlərinə
görə, qurum gənclər arasında dialoqun qurulması baxımından
əhəmiyətli iş görür. Babayev əməkdaşlıq imkanlarının yaxınlaşdırmaq
üçün mütəmadi iclasların keçirilməsinin vacib olduğunu deyib.
Macarıstanın İnsan Resursları Nazirliyinin Gənclərlə iş üzrə dövlət
katibinin müavini Norbert Kiss çıxışında qeyd edib ki, Macarıstan
tarixi İpək yolu qovşağında olan ölkələrlə münasibətlərin
dərinləşdirilməsində maraqlıdır. O vurğulayıb ki, ölkəsi bununla
bağlı gənclər təşkilatına ən yüksək səviyyədə dəstək verməkdə
hazırdır.
Üzvlər Şurasının iclasında 2013-cü il üçün fəaliyyət planı müzakirə
olunub və görülən işlər barədə hesabat verilib. İclasda gündəlik
təsdiq olunduqdan sonra ötən iclasdan sonra görülən işlərlə bağlı
hesabat verilib. Daha sonra təşkilat üzvləri tərəfindən 2014-cü il
üçün Fəaliyyət planı müzakirəyə çıxarılıb və qəbul edilib.