"BMT Təhlükəsizlik Şurasında qəbul olunan müddəaları yüksək
qiymətləndirirəm. Azərbaycan artıq dünya birliyində qəbul olunan və
hörmətli dövlətlərdən birinə çevrilib. Azərbaycanın BMT
Təhlükəsizlik Şurasına sədrlik etməsi onun bu missiyanı öz üzərinə
götürməsindən xəbər verir". Bu sözləri Yeni Azərbaycan Partiyasının
(YAP) sədr müavini-icra katibi Əli Əhmədov jurnalistlərə verdiyi
açıqlamasında deyib.
Ə. Əhmədovun sözlərinə görə, Prezident İlham Əliyevin bəyan etdiyi
kimi Azərbaycanın xarici siyasəti bütövlükdə sülhə, təhlükəsizliyə
xidmət etməkdir. YAP-ın sədr müavini qeyd edib ki, Azərbaycanın
işğala məruz qalmasına baxmayaraq daim sülh və əmin-amanlıq uğrunda
mübarizə aparır. Bu mübarizəni hazırda BMT Təhlükəsizlik Şurasına
sədrliyi dövründə də həyata keçirir.
"Güman edirəm ki, Azərbaycanın bu missiya çərçivəsində atdığı
addımlar bütün dünya dövlətləri tərəfindən qəbul olunacaq. Çünki
Azərbaycan ədalət uğurunda mübarizə apardığını bəyan edib və
dünyada bu sahədə ciddi bir çatışmazlığın olduğunu xüsusi şəkildə
etiraf etmək lazımdır . Ümid edirik ki, Azərbaycanın bu sahəyə
verəcəyi töhfələr kifayət qədər tutarlı olacaq,"- deyə Ə. Əhmədov
sözlərinə əlavə edib.