Mingəçevirdə məcburi köçkünlər üçün yeni mənzillər
26 May 2013 11:11 (UTC+04:00)
Mövqe.az EL TV-yə istinadən xəbər verir ki, bununla əlaqədar
olaraq Mingəçevir şəhərində təhsil mərkəzində məskunlaşan məcburi
köçkünlər yeni mənzillərə köçürülməkdədir.
Mingəçevir şəhərində təhsil mərkəzlərindən birində məskunlaşan
məcburi köçkünlərin yeni mənzillərə köçürülməsi prosesinə
başlanılıb. Köçürmə prosesində 14 orta təhsil mərkəzində
məskunlaşan Ağdam, Kəlbəcər, Füzuli və Şuşadan olan məcburi köçkün
ailələri köçürülür. Bununla yanaşı, "fin" evlərində yerləşən və
Şəhər Texniki Yaradıcılıq Evində məskunlaşan ailələrin də yeni
yaşayış kompleksinə köçürülməsi planlaşdırılır. 1, 2, 3 və 4-otaqlı
mənzillərin neçə nəfərlik ailəyə verilməsi əvvəlcədən müəyyən
edilsə də, mənzillərin hansı mərtəbədən verilməsi püşkatma ilə
həyata keçirilir.
Qeyd edək ki, yeni yaşayış kompleksi bütün zəruri infrastrukturla
təmin olunub. 10 ədəd 9-mərtəbəli yaşayış binasının daxil olduğu
kompleksdə 480 şagird yerlik məktəb, 50 yerlik uşaq bağçası, klub,
inzibati idarəetmə mərkəzi, tibb məntəqəsi və digər zəruri
infrastruktur yaradılıb. Mənzillər elektrik enerjisi, mavi yanacaq
və mərkəzi isitmə sistemi ilə təmin olunub. Yeni mənzillərə
köçürülən ailələrin daşınması üçün dövlət tərəfindən pulsuz yük
avtomobilləri də köçürməyə cəlb olunub. Nəzərinizə çatdıraq ki, 502
məcburi köçkün ailəsinin yeni mənzillərə köçürülmə prosesinin bir
neçə günə başa çatması planlaşdırılır.