Heydər Əliyev Mərkəzinin keçirdiyi müsabiqənin nəticələri açıqlanıb
22 İyun 2013 15:40 (UTC+04:00)
Bu gün Bakıda Heydər Əliyev Mərkəzinin Heydər Əliyevin 90 illik
yubileyi münasibəti ilə elan etdiyi altı müsabiqədən beşinin
nəticələri elan olunub.
Nəticələrin elan olunma mərasimində bildirilib ki, nəticələri elan
olunan müsabiqələrdən başqa əsgərlər arasında keçirilən müsabiqənin
nəticələri 26 İyun - Silahlı Qüvvələr günü ərəfəsində elan
olunacaq.
Nəticələri bu gün elan olunan müsabiqələr isə gənclər arasında
"Azərbaycanımla fəxr edirəm", müəllimlər arasında "Dövlətim üçün
layiqli vətəndaş yetişdirirəm", jurnalistlər arasında "Azərbaycanın
xarici siyasətdə ən böyük nailiyyəti", "Azərbaycan - beynəlxalq
layihələrin təhlükəsiz ünvanı", "Azərbaycan xarici siyasətinin
prioritetləri", rejissorlar arasında Azərbaycanın tanıtım video
çarxların müsabiqəsi və əcnəbi fotoqraflar arasında olan
"Azərbaycan əcnəbilərin gözü ilə" müsabiqələridir.
Bütün müsabiqələr üzrə I, II və III yerin qalibləri ilə yanaşı
həvəsləndirici mükafatlar da olub. Qaliblərə kompüter, planşet və
digər hədiyyələr paylanıb.
Mərkəzin rəhbəri Anar Ələkbərov çıxış edərək bildirib ki, Heydər
Əliyev Mərkəzi bir sıra layihələr həyata keçirib: "Bunlar arasında
90 illik yubiley ərəfəsində keçirilən müsabiqələr ən maraqlı
hadisələrdəndir".