“Azəriqaz”ın baş direktoru və müavinləri vətəndaş qəbulu keçirib

23 Oktyabr 2020 17:05 (UTC+04:00)
"Azəriqaz" İstehsalat Birliyinin baş direktoru Ruslan Əliyev Naftalan şəhəri, baş direktorun satış və istismar üzrə müavini Cahid Hüseynov Daşkəsən rayonu, baş direktorun əsaslı tikinti üzrə müavini Ramil İskəndərov isə Samux rayonunun sakinləri ilə birbaşa videobağlantı yaratmaqla onlayn vətəndaş qəbulu keçiriblər. Bu barədə Mövqe.az-a Azərbaycan Dövlət Neft Şirkətinin (SOCAR) "Azəriqaz" İstehsalat Birliyindən məlumat verilib. Bildirilir ki, vətəndaşların qəbulda iştirakı üçün karantin rejiminin tələbləri gözlənilməklə şərait yaradılıb. Müraciətlər zamanı əsasən fərdi şəkildə qaz çəkilişlərinə köməklik göstərilməsi, küçə qaz xətlərinin çəkilməsi və digər məsələlərlə bağlı fikir mübadiləsi aparılıb. Bəzi vətəndaşlar isə bundan öncə keçirilən qəbul zamanı onlara qaz çəkilməsi üçün köməklik göstərildiyinə görə təşəkkür ediblər. Sonda baş direktor R.Əliyev Gəncə və Şəmkir Regional qaz istismarı İdarələrinin rəhbərliyinə qaldırılan problemlərin hava şəraitinin kəskin soyumasına qədər icra edilməsi barədə göstərişlərini verib. Bundan başqa, ön cəbhədə döyüşlərdə iştirak edən abonentlərin ailələrinin müraciətlərinə həssaslıqla yanaşılmasını tapşırıb.